Protesta e flamingove në Shkodër, ishte një sukses i plotë! Nuk mbahet mend se kur Shkodra, kishte parë një protestë apo edhe tubim, edhe lektoral, të atyre përmasave. Pak rëndësi ka nëse e organizoi në prapaskenë Mundësia, Shqipëria Bëhet Bashkë apo edhe dega lokale e PD- së. Protesta e përcolli fuqishëm mesazhin e saj për ndryshime të domosdoshme në realitetin aktual, qoftë edhe ndryshime të forta politike. Por sigurisht, protesta duhej të ishte ndryshe dhe rezultoi ndryshe nga ajo e Tiranës apo edhe qyteteve të tjera.
Slogani i famshëm “Rama në burg, Berisha në burg”, ushtoi jo pak herë gjatë marshimit por edhe në sheshin para bashkisë ndërsa e vetmja pankartë eksplicite (shikoni foton më poshtë), u zhduk kur tubimi u përqendrua. Personi që mbante në duar, të ngritura lart, identifikohet lehtësisht, si një nga protestuesit e Baks- Rrjoll në Velipojë. Në momentin që protestuesit ishin para bashkisë Shkodër, i njëjti person, shihet teksa mban në duar posterin, por të mbledhur tub. Personi që ka evidentuar këtë fakt dhe ka dërguar fotot në ShkodraWeb, mbështet idenë se protestuesit iu “sugjerua” të mos ekspozonte posterin. Ndërsa, edhe në foto, nuk shihet asnjë slogan tjetër “Rama në burg, Berisha në burg”.
Madje, si me humor, personi që ka dërguar këto foto, sugjeroi edhe titullin e këtyre pak radhëve. Përtej kësaj, e cila sigurisht shoqërohet edhe me nota ironie, e rëndësishme është se Shkodra reagoi, është zgjuar nga një letargji e frikshme, siç edhe shumica e qyteteve të tjera të vendit.
