Vettingu jep efektet e pare, 7 funksionare te drejtesise dorehiqen (emrat)

Shtatë funksionarë të sistemit të drejtësisë kanë dhënë dorëheqjen për t’i shpëtuar vetettingut duke u larguar nga detyrat e tyre.
Burime nga Presidenca, pranë së cilës dorëzohen dorëheqjet, thanë për Report TV se mes tyre janë tre gjyqtarë, një prokuror dhe 3 ndihmës ligjorë në Gjykatën e Lartë.
Sipas listës së siguruar nga Report TV, prokurori i vetëm i dorëhequr është Sulejman Tola, i Prokurorisë së Rrethit Krujë.
Gjyqtarët janë: Ilir Çeliku i Gjykatës së Apelit, Vlorë, Ilir Pashaj i Gjykatës së Shkallës së Parë Elbasan dhe Mirela Fana Gjyqtare pranë Gjykatës së Lartë.
Nga Gjykata e Lartë kanë dhënë dorëheqjen edhe dy këshilltarët ligjorë: Eritan Shehu dhe Adnand Berdica, si dhe ndihmësja ligjore Etleva Sherifi.
Sipas Nenit 56 të ligjit të rivlerësimit, gjyqtarët dhe prokurorët mund të jepnin dorëheqjen brenda tre muajve pas hyrjes në fuqi të ligjit, afat i cili ka përfunduar.
Këta persona të dorëhequr i shpëtonin vettingut, pra hetimit pasuror, profesional dhe të lidhjeve me krimin. Madje, të dorëhequrit mund të përfitonin edhe pension kalimtar, por nuk mund të riktheheshin më në sistemin e drejtësisë pa ju nënshtruar sërisht vettingut.
Tashmë që procedurat e vettingut kanë nisur për rreth 800 gjyqtarë e prokurorë, dorëheqjet nuk lejohen më sipas ligjit.
Të gjithë do t’i nënshtrohet rivlerësimit pa të drejtë dorëheqjeje në mes të procesit. Këtë pikë unioni i gjyqtarëve e ka ankimuar në Gjykatën Kushtetuese, ku kërkojnë që të rrëzohet neni, dhe e drejta e dorëheqjes të jetë në cdo moment.
Pra, gjyqtarët kërkojnë që t’i nënshtrohen vettingut, dhe nëse kapen me shkelej të kenë mundësinë të japin dorëheqjen pa mbajtur përgjegjësi penale, ndërsa nëse nuk kapen me probleme, të vijojnë detyrën normalisht.
Vendi i Gjykatës Kushtetuese për këtë çështje është shtyrë në shtator.