Të dashur miq,
Të nderuar lexues,
Të respektuar mbështetës,
Edhe pak orë mbyllet një tjetër vit ku kemi qenë në shoqërinë e njëri- tjetrit. Janë 365 ditë ku jemi përpjekur të kryejmë misionin tonë: Informimin e drejtë e të gjithanshëm të lexuesve, në hapësirën tonë në “oqeanin” e mediave tradicionale e online.
Mendojmë se edhe këtë vit, kemi zbatuar me përpikmëri parimin tonë “E Verteta nuk negociohet” sepse vetëm e verteta të bën të lirë. Kemi qenë një pasqyrë për të gjithë ndjekësit tanë, kemi marrë shumë mbështetje nga ju por edhe mjaft kritika. Besojmë e shpresojmë se me nisjen e një tjetër viti, shumë nga kritikat tuaja do të jenë shumë të vlefshme në punën tonë.
Në prag të vitit të ri 2020, ne rinovojmë detyrimin tonë përballë jush për të qenë një burim informacioni i drejtë, i paanshëm dhe i bazuar vetëm tek e verteta! Këtë vit, do të rrisim edhe më shumë mundësinë që ju të jeni reporterët tanë, që në hapësirën tonë të gjeni gjithmonë një mundësi për të shprehur shqetësimet e problemet tuaja. Dhe ne do të përpiqemi vazhdimisht të rrisim, të amplifikojmë zërin tuaj.
Nuk mund të rrimë pa ju FALENDERUAR, para se të përcjellim urimet tona! Ju falenderojmë emër për emër, të gjithëve, në të gjitha rrjetet tona sociale ku ju nuk na keni kursyer mbështetjen tuaj.
Ju urojmë shendet e pare, siç thuhet në Shkodër! Ju urojmë sa më shumë sukses e fat, mbarësi e zhvillim për ju, familjet tuaja dhe të dashurit e zemrës. Një urim të veçantë për të gjithë bashkëqytetarët e bashkëkombasit tanë që këtë fundvit janë në vendlindje, në Shkodër e Shqipëri: Sa më shpejt të bashkuar me familjet e të afërmit tuaj aty ku ju dëshiron zemra!
GËZUAR E PËR SHUMË VJET NGA SHKODRAWEB MEDIA!