Ndërsa opozita nuk duket e interesuar për zgjedhjet vendore të 30 qershorit duke patur si synim vetëm rrëzimin e kryeministrit Rama, shumica qeverisëse vazhdon fushatën e pashpallur zyrtarisht. Tashmë janë kristalizuar emrat në shumë nga bashkitë ku socialistët e mendojnë të sigurtë fitoren, por nuk po ndodh kështu në bashkitë e tjera, si për shembull për Shkodrën.
Prej rreth 2 vitesh kanë nisur të lakohen emra të shumtë si kandidatë të mundshëm, duke filluar me Senida Mesin, Astrit Becin, Genc Berhanin dhe deri tek më i fundit, Valdrin Pjetri i cili u emërua prefekt para 2 javëve. Arsyeja e këtij emërimi, ka qenë pikërisht dhënia e mundësisë për tu promovuar përmes pozicionit të rëndësishëm. E në fakt, këto tre javë ka qenë mjaft i pranishëm mediatikisht dhe jo vetëm.
Por siç duket, një kandidim i mundshëm i Pjetrit, nuk sjellë unifikim të faktorëve të majtë, socialistë dhe jo në Bashkinë e Shkodrës. Duke nisur nga prezantimi zyrtar i Pjetrit si prefekt, ra në sy mungesa e ish- ministrit të jashtëm Ditmir Bushati, deputet dhe i deleguar i PS-së për qarkun Shkodër. Madje, përveç tij mungonin edhe deputetët e tjerë socialistë Mesi, Harusha dhe Sterkaj. Pak kush e kuptoi “mesazhin” që deshën të japin deputetët socialistë për përfaqësuesin e kryeministrit në Qarkun e Shkodrës. Ishte e qartë se emërimi i Pjetrit nuk kishte kaluar përmes “linjave” të veprimit politik socialist. Në një ceremoni ku nuk mungoi as babai i prefektit Luigj Pjetri, muanguan të gjithë deputetët e mazhorancës, edhe pse prezantimi u bë nga vetë një ministër.
Që nga dita e emërimit të Valdrin Pjetrit si prefekt, lidershipi i PS-së në qendër, është përpjekur të nisë sinjale se do të jetë ai kandidati socialist për Bashkinë e Shkodrës. Madje, burime jozyrtare në PS flasin edhe për një darkë “paqtimi” para disa ditëve, të niciuar nga kryeministri Rama. Përveç deputetëve socialistë, kanë qenë edhe të tjerë që mbështesin mazhorancën nga jashtë. Zyrtarisht, Rama u ka kërkuar mbështetjen të gjithë të pranishmëve për Valdrin Pjetrin si kandidat për Shkodrën dhe është dëgjuar vetëm një zë, ai i Ditmir Bushatit. Ai e ka bërë të qartë se nuk do të punojë për kandidatë të propozuar nga deputetë jo socialistë, qoftë edhe që mbështesin mazhorancën në Kuvend. Reagimi i drejtpërdrejtë i Bushatit është pasuar nga ai i vetë Ramës, shtojnë të njejtat burime. Ai i është drejtuar shqeto dhe prerë ish- ministrit të tij: “Ose mbështesni këtë kandidat, ose kandido dhe fitoje ti vetë Bashkinë e Shkodrës, ke një javë kohë për tu menduar”, i është drejtuar Rama- Bushatit.
Dashje pa dashje, ish- ministri Bushati është bërë pjesë e “lojës” për Bashkinë e Shkodrës, ku deri tani akoma nuk ka një kandidat unifikues të të gjithë faktorëve. Këto kontradikta, të cilat njohen e diskutohen në të gjitha nivelet edhe në PS-në e Shkodrës, duket se mbajnë peng edhe shpalljen zyrtare të emrit zyrtar. /ShkodraWeb/
