Vllaznia nuk ia doli të shënojë dhe duhet të mjaftohet me një pikë në takimin me Dinamon, që nuk prodhoi asnjë gol. Ndeshja e tretë radhazi që ekipi shkodran nuk pësoi gol, por sulmi nuk funksionoi. Trajneri Thomas Brdaric analizoi sfidën në “Gol pas Goli” në Supersport, ku ndër të tjera tha:
“Nuk është e drejtë të krahasosh ndeshjet, kohë tjetër e mundësi të tjera. Kemi luajtur jashtë fushe ndaj një ekipi që nuk ka pasur rezultate, por jo mungesë kualiteti.
U thashë lojtarëve që isha kurioz si do të përballonim këtë ndeshje dhe e pashë në pjesën e parë se si ishte një paraqitje e dobët nga ne me shumë gabime taktike. Dhe nëse luajmë ashtu nuk do të jemi të suksesshëm.
Në pushimin e ndeshjes u thashë lojtarëve që është e pamundur të luajmë njëlloj keq dhe ndryshuam. U përmirësuam dhe na mungoi fati që të shënonim në pjesën e dytë.
Nuk arritëm të shpërthenim në krahë, duhej të fitonim duele, por nuk ia dolëm. Mendoj se ishte mungesë e dueleve të fituar, por për mua ishte thelbësore që në pjesën e parë nuk fituam topin e dytë dhe mendoj se pse nuk ia dolëm të hynim mirë në ndeshje”, deklaroi trajneri i kuqebluve.
