Alfred Koçobashi, i përzgjedhur në 6 kandidaturat për “primaret” për kryetar të Bashkisë Shkodër, shkruan në Facebook: Bashkëqytetarë të nderuar, në pergjigje të sfidave të kohës, e ndjej detyrim qytetar angazhimin tim me procesin e primareve për përzgjedhjen e kandidaturës më të mirë për Drejtimin e Bashkisë Shkodër.
Falenderoj Komisionin e Rithemelimit për procesin transparent dhe gjithpërfshirës në këtë fazë, me bindjen që këto vlera dhe risi do i shërbejnë edhe ringritjes e besimit qytetar në vijim në proceset e përzgjedhjeve të individëve të duhur për drejtimin e institucioneve publike nga ekspertë dhe njerez me rekorde të provuara në shërbim të së mirës së përbashkët.
Ftoj demokratët e Shkodrës të votojnë nesër me përgjegjësi dhe masivitet për t’i sjellë këtij qyteti besim dhe entuziazëm në ripërtërirjen e vlerave më të mira qytetare shkodrane, ku opinioni publik dhe konkurenca e vlerave janë vendimtare në çdo proces përzgjedhës nga qytetarët.
I uroj suksese të gjithë kandidatëve dinjitozë të listës së paraqitur dhe fitoftë më i miri, për të vazhduar së bashku pastaj si një skuadër rreth liderit të zgjedhur demokratikisht në garën për Bashkinë e Shkodrës!
