Që pas 11 majit 2025, po flitet shpesh për skemën e manipulimit në zgjjedhje përmes skemës së “trenit bullgar”, Është një skemë që është përdorur në shumë vende, edhe në Bullgari, prej nga duket se është marrë edhe emri i skemës manipulative.
Në dukje, skema është mjaft e lehtë për tu realizuar, teksa mjafton që një fletë votimi e paplotësuar por e rregullt, me vulat përkatëse, të dalë nga qendra e votimit. Më qartë, skema paraqitet më poshtë.
SKEMA E “TRENIT BULLGAR”
Fillimi i manipulimit
Dikush arrin të sigurojë (në mënyrë të paligjshme) një fletë votimi origjinale, të pa përdorur, nga një qendër votimi.
Plotësimi i fletës jashtë qendrës
Fleta e votimit plotësohet jashtë (për shembull me votë për një kandidat të caktuar).
Hyn votuesi i parë i blerë
Ky votues merr fletën e paraplotësuar dhe e fut në kuti, pa plotësuar fletën që i jep komisioni zgjedhor.
Votuesi e fsheh fletën e pastër
Në vend që ta plotësojë, ai e fsheh fletën e papërdorur që mori nga komisioni dhe e nxjerr jashtë, duke e dorëzuar te organizatori.
Rifillon cikli
Organizatori plotëson fletën e re të marrë dhe ia jep votuesit tjetër të blerë. Ky futet në qendër votimi, fut në kuti fletën e plotësuar dhe nxjerr një tjetër të pastër.
