Vëmendjen e ka marrë shkarkimi i Belinda Ballukut por edhe i Elisa Spiropalit si ministra të kabinetit qeveritar Rama, ndërsa ka humbur vëmendjen një fakt tjetër, jo pak i rëndësishëm. Tashmë, tre ministra nga Veriu, 2 prej të cilëve nga qarku i Shkodrës, pritet të dekretohen si ministra nga Presidenti Bajram Begaj për tu miratuar më pas në Kuvend.
Një diplomat karriere si Ferit Hoxha, i lindur në Koplik të Malësisë së Madhe, do të jetë ministër i jashtë, pozicion mjaft i rëndësishëm në çdo qeveri. Përsëri nga qarku i Shkodrës, Enea Karakaçi, i lindur në Shkodër, do të jetë ministër i Infrastrukturës dhe Energjitikës, ndoshta dikasteri më i rëndësishëm i qeverisë aktuale. Ermal Nufi, i cili në fakt prezantohet si nga Kukësi (edhe ai verilindje e vendit), është me origjinë nga Mirdita, djali i një mjeku të njohur dhe i është besuar një tjetër dikaster i rëndësishëm si Ministria e Mbrojtjes. Interesant është fakti se asnjëri, nuk ka një profil të qartë, të pastër dhe të niveli të dukshëm në politikën aktuale.
Pse përbëjnë lajm këto 3 emra? Sepse nga shumë drejtime, kryeministri Rama është etiketuar si jo shumë dashamirës i Veriut, duke nisur arsyetimin në shumicën e rasteve, tek mungesa e emrave nga kjo hapësirë gjeografike e vendit. Sigurisht, nuk do të mungojnë hamendësimet e aludimet e zakonshme, për ndikimet e “X” apo “Y” në këto emërime, që në fakt kanë filluar tashmë. Përtej tyre por edhe përtësive politike- partiake, këto emërime mund të shihen si reflektim i Kryeministrit por edhe si “marifet” i mundshëm, për të heshtur zërat e deritanishëm për raportin e tij me Veriun dhe përfaqësuesit e tij. Mbetet të shihet, në vjimësi! /ShkodraWeb/
