Ish-kryeministri Sali Berisha ka paralajmëruar se do të shkojë sërish në selinë e Partisë Demokratike, por pa zbuluar nëse do të ketë sërish një protestë si ajo e 8 janarit.
Në një intervistë në emisionin “Now”, Berisha tha se këtë herë ai do të përgatitet më mirë dhe në mënyrë më serioze, por pa e saktësuar sa çfarë ka ndërmend.
Berisha deklaroi se policia hyri në seli, kur e pa se godina po merrej nga protestuesit.
“Policia ka hyrë sepse e pa që protestuesit po merrnin selinë. Edi Rama është i tmerruar sot. Ai të gjithë sigurinë e tij e ka mbështetur te blindet. Këtë aplikoi te selia e PD. Është projekti i Ramës. Me faktin që revolucioni paqësor i shkriu blindet, është një tmerr për Edi Ramën“, deklaroi Berisha.
Ai foli edhe për aspektet logjistike, duke pranuar se ka vështirësi në gjetjen e pajisjeve kundragaz, por se kjo gjë do të realizohet dhe pas “përgatitjeve serioze”, PD do t’ju rikthehet demokratëve, duke paralajmëruar kështu, betejën e rradhës për marrjen e selisë.
“Tani i ka ngelur vetëm gazi. Edhe gazi ka mjetet e veta… Pajisjet anti-gaz gjenden me vështirësi, prandaj do bëhen përgatitje më serioze herën tjetër dhe tempulli do u kthehet demokratëve“ , – tha ndër të tjera Berisha.
