Reagim publik
Në lidhje me deklaratën e bërë publike së fundmi, ku përmendet emri im në mënyrë të papërgjegjshme dhe të pabazuar, dëshiroj të shpreh me vendosmëri se akuzat ndaj meje janë tërësisht të pavërteta dhe të fabrikuara me qëllime të qarta politike.
Asnjëherë dhe në asnjë rrethanë nuk kam qenë i përfshirë në veprime që cenojnë procesin zgjedhor apo që përbëjnë shkelje të ligjit. Si administrator i Njësisë Administrative Dajç, kam ushtruar dhe vazhdoj të ushtroj detyrën me ndershmëri, transparencë dhe në shërbim të qytetarëve.
Ky është një sulm i ulët, që tregon qartë humbjen madhështore që pret Partinë Demokratike në Dajç, dhe dëshpërimin që i ka kapur përballë mbështetjes së gjerë që qytetarët po i japin alternativës sonë.
Akuzat për “blerje vote”, të mbështetura në thashetheme dhe pa asnjë provë, përbëjnë një tentativë të rëndomtë për të më përfshirë në një lojë politike, në të cilën nuk kam qenë dhe nuk do të jem pjesë.
Ftoj publikisht SPAK-un dhe të gjitha institucionet ligjzbatuese të hetojnë çdo pretendim, dhe shpreh gatishmërinë time të plotë për bashkëpunim, në mënyrë që e vërteta të dalë në dritë sa më parë.
Unë nuk kam asgjë për të fshehur dhe çdo përpjekje për të më dëmtuar imazhin do të marrë përgjigjen e merituar në rrugë ligjore.
Dajçi nuk meriton që në ditë të tilla të rëndësishme për demokracinë, vëmendja të zhvendoset nga procesi zgjedhor te shpifjet. I bëj thirrje çdo qytetari të mos bjerë pre e këtyre manipulimeve dhe të ruajë besimin te drejtësia dhe te forca e së vërtetës.
Broz Pjetrani
Administrator i Njësisë Administrative Dajç
