Pavarësisht porrosisë së dhënë nga kryeministri Rama që deputetët në Kuvend të perqendrohen në fjalimet e tyre brenda sallës dhe jo tek zhvillimet e protestës së opozitës jashtë parlamentit, Taulant Balla “e ka shkelur” rregullin. Nga foltorja e Kuvendit jo vetëm është marrë me protestën e opozitës, por edhe me vetë liderin Lulzim Basha dhe ata që janë pjesëmarrës në protestë. Nga ana tjetër, Balla ka vlerësuar policinë për mirëadministrimin e protestave, duke i ftuar të ndërmarrin nisma ligjore për ashpërsimin e ligjeve për ata që godasin policët, deputetët, zyrtarët për shkak të detyrës. Kreu i Grupit të PS-së, tha më tej se maxhoranca pas vetingut në Drejtësi dhe në Polici, do çojë përpara dhe vetingun në politikë.
“Doja të përgëzoja sot ministrin Lleshaj për miradministrimin e situatave si këto të sotmet, ku një grup politikanësh të korruptuar, së bashku me element kriminal po tentojnë të bllokojnë rrugën europiane të Shqipërisë.
Keni mbështetjen tonë për të ashpërsuar Kodin Penal, për këto që ushtron dhunë për shkak të detyrës. Ne nuk u tërhoqëm nga vetingu në Drejtësi, nuk tërhiqemi nga vetingu në polici dhe do të bëjmë realitet vetingun në politikë. Do ishte mirë dhe opozita ta mbështeste sepse kur vjen puna për vetingun duhet të jemi të gjithë bashkë”, ka thënë Balla.
Më tej Balla e ka quajtur Bashën si huligan që godet forcat e rendit.
“Lulzim Basha është një huligan që merr përsipër të godasë punonjësit e policisë së shtetit apo personat e zgjedhur me votë, por të jeni të sigurte kushdo tenton të ushtrojë dhunë do marrin ndëshkimin e merituar”, tha ai.
