Ka zgjatur 40 minuta takimi kokë më kokë i Benet Becit, drejtuesi politik i qarkut të Shkodrës me kryeministrin Rama. Temë kryesore e takimit mësohet se ka qenë paraqitja nga Beci e kanditaturave për deputetë në listën e qarkut Shkodër.
Nga takimi, nuk ka rrjedhur asgjë, ndërsa burime mediatike që e kanë ndjekur gjatë gjithë ditës takimet e kreut të PS- së Rama me drejtuesit politikë të qarqeve, bëjnë me dije se tre janë emrat më të lakuar deri në këto momente:
-Majlinda Angoni, Prefekte e Shkodrës
-Onid Bejleri, Zëvendëskryetar i Bashkisë Shkodër
-Frrok Gjini, Deputet aktual
Vlen të theksoset se lista e qarkut ka 11 emra dhe sipas përcaktimeve të KQZ- së, ajo e propozuar nga partitë politike, duhet ta tejkalojë edhe këtë numër. Disa ditë më parë ka qarkulluar edhe një listë me emrat e Xhenis Çela, Onid Bejleri, Majlinda Angoni, Enertil Canaj, Ndriçim Sterkaj, Amila Gjyrezi, Besmir Lesha dhe Frrok Gjini.
Pak orë më parë, në një takim për 8 Mars, kryeministri Rama tha se gratë e vajzat do të jenë në listat e mbyllura, ndërsa burrat do të dalin të kërkojnë mandate, duke aluduar se sidomos ata që janë aktualisht deputetë, do jenë në listat e hapura për të mbledhur vota.
Mesnata e datës 12 mars, është afati i fundit për depozitimin e listave në KQZ teksa takimet tek Vila 30 në Tiranë, i kanë paraprirë mbledhjes së Kryesisë së PS- së të merkurën që do të zyrtarizojë edhe listën përfundimtare. Përflitet se kryeministri Rama do të kandidojë në Tiranë, duke qenë pjesë e listës së hapur dhe jo asaj të sigurtë.
