Nga ferri, në parajsë. Kështu mund të përkufizohet ky rrugëtim 10- mujor i Vllaznisë, e cila, nga të qenit në prag të përsëritjes së një tjetër katastrofe historike, rënies sërish në Kategorinë e Parë, e mbylli sezonin 2020-2021 duke e humbur titullin “kampion” për një diferencë prej vetëm 4 golash, dhe duke fituar, pas 13 vjetësh, Kupën e Shqipërisë.
Dhe i gjithë ky shndërrim mbresëlënës ka patur si protagonist biznesmenin shkodran, Alban Xhaferi, i cili ka bërë që jo vetëm Shkodra, por e gjithë Shqipëria të rifitojë një aset të çmuar si Vllaznia. Dhe, në një rrëfim të posaçëm në 360 gradë për RTSH Sport, 42-vjeçari e kujton si sot atë ndeshje të dy gushtit 2020 të “play-out”-it kundër Besëlidhjes, që ishte zanafilla e projektit të tij me klubin e vendlindjes.
“Ishte një moment, në të cilin po mendonim nëse do vazhdonim me projektin që kishim, apo nuk do vazhdonim të nesërmen. Ishte një moment shumë delikat për ekipin, por e kaluam me sukses. Tani vijmë pas më shumë se 10 muajsh, Vllaznia ka fituar Kupën dhe është nënkampione e Shqipërisë.
Besoj se llogaritë janë të qarta dhe Vllaznia e madhe është rikthyer tashmë. Nga një situatë, ku rrezikonte të dilte nga kategoria, tani jemi në një situatë tjetër ku është rikthyer besimi, tifozët po kënaqen me lojë. Jo vetëm Shkodra, por e gjithë Shqipëria ka krijuar idenë se Vllaznia është një skuadër pretendente dhe që bën një futboll të bukur”.
Po si ka qenë ky rrugëtim për biznesmenin që, pas përvojës me Vllazninë tek basketbolli, kaloi tek futbolli?
“Ishte një rrugëtim i jashtëzakonshëm. Sigurisht që dua të përmend dhe Kryetaren e Bashkisë, e cila bëri të mundur arritjen e marrëveshjes, ka qënë në një suport të vazhdueshëm për ta mbështetur ekipin, si e ka mbështetur edhe më parë, pavarësisht rezultateve. Hymë me dëshirën e mirë për të rritur vlerën e Vllaznisë dhe për të mbërritur këtu ku jemi.
Ka patur sfida nga më të ndryshmet. Sigurisht që ka patur edhe kritika, me vend dhe pa vend. Unë dua ti mirëkuptoj kritikat me vend, sepse na kanë shtyrë që të zhvillohemi edhe më mirë. Kritikat pa vend, në momentin që janë pa ndonjë dashakeqësi, dua tu them që jemi munduar të bëjmë maksimumin, me një punë të pastër, ndoshta dhe përtej mundësive që kemi. Sigurisht që ka patur dhe “shkopinj nën rrota”, duke u munduar ta dëmtojnë këtë projekt, ashtu sic ndoshta mund të mundohen përsëri, sepse bota e futbollit është e egër, por nuk duhet të merremi me ta, duhet të shikojmë përpara, sepse Vllaznia i përket gjithë qytetit, që na ka dhënë një mbështetje të madhe.
Shumë njerëz në rrugë na ndalojnë dhe na përgëzojnë për punën që është bërë. Dua të theksoj atë që më tha një tifoz para ca ditësh: ‘mirë unë që jam tifoz dhe pyes, por nëna ime që është mbi 85 vjece dhe më thotë, si shkoi Vllaznia’. Është një Vllazni që i ka goditur të gjithë, besoj se kjo është gjëja më e bukur që kemi arritur në këtë projekt”.
“Momenti më i vështirë i këtyre 10 muajve?
Dua të vecoj dy momente. Momenti i parë është kur siguruam Superioren. Momenti i dytë është faza e licensimit, një moment kritik ku e kam ndjerë veten shumë keq. Nëse nuk do finalizohej me sukses, atëherë do mundim do të shkonte kot. Dua të falenderoj të gjithë ata që kanë kontribuar, Kryetaren e Bashkisë, presidentin e FSHF-së, si dhe drejtorin e tatimeve, që me dëshirën e tij të mirë bëri të mundur realizimin e marrëveshjes”.
“Momenti i krizës dhe cështja e trajnerit?
Mendoj se janë një proces normal, sigurisht jo i këndshëm, sepse patëm një rënie. Puna e trajnerit ishte dicka e brendshme, gjë e cila ndodh në një familje”.
Xhaferi e pranon se Kupa ishte njëfarë ngushëllimi për atë zhgënjim në betejën për titull, ku vetëm matematika bëri dallimin.
“Kupa ishte një ngushëllim për mosarritjen e titullit, por më shumë ishte finalizimi i një mundi të gjatë, që u bë për një vit pune, ku nuk shkoi mundi dhe djersa kot e të gjithëve. Nuk po flas për veten time, por po flas për të gjithë grupin që është krijuar, për të arritur aty ku Vllaznia arriti. Sigurisht që jemi shumë të lumtur: fitimi i Kupës, nënkampion të Shqipërisë arritja në Kupat e Europës, janë një tregues se Vllaznia është aty ku duhet të jetë”.
Tanimë, sezoni i shkuar është lënë pas dhe vështrimi është hedhur drejt sezonit të ri, ku rikonfirmimet kanë nisur të zyrtarizohen, ashtu siç pritet të ndodhë edhe me trajnerin gjerman, Tomas Brdariç.
“Dua të them dicka, me Plorin është arritur marrëveshja, por edhe me Matko Darmjatin kemi arritur marrëveshjen. Me trajnerin Brdaric, dua të them se kemi patur disa diskutime të shëndetshme.
Si e ka shprehur dhe në media, është për vazhdimin e projektit, për të është një sfidë në vetvete. Sigurisht që ka meritën e tij që Vllaznia ka arritur në këto nivele, por jemi në diskutime për disa detaje teknike, që unë jam optimist se do të arrijmë me sukses për të vazhduar projektin me Brdaric.
Të shikojmë në vazhdim dhe shpresoj të kemi një finalizim, por duhet theksuar se të gjithë jemi të përkohshëm, ndërsa Vllaznia është e gjithë tifozëve. Sigurisht që ndryshime do të ketë, është dicka normale në sport”.
Donatori i klubit shkodran zbulon se mbetet i hapur për oferta për lojtarët aktualë të skuadrës, ndërsa rrëfen edhe procesin e rinovimit të grupit.
“Unë mendoj se është krijuar një grup, sepse para përfundimit të kampionatit kemi rinovuar disa kontrata, sic është Gurishta, Krymi, Adili dhe disa lojtarë të tjerë. Sigurisht që janë një potencial i mundshëm për tu transferuar jashtë vendit. Po shikojmë mundësitë, për ti transferuar në një klub më të mirë se Vllaznia, edhe për prespektivën e tyre, por edhe për të krijuar disa të ardhura shtesë për klubin.
Ky është plani i parë. Janë gjithashtu një grup prej tetë lojtarësh, të cilëve u ka mbaruar kontrata dhe me disa prej tyre jemi në diskutime për vazhdimësinë. Po shikojmë dhe për afrimin e lojtarëve, të cilët do plotësojnë vendet vakante dhe ku kemi patur problem, sic është sulmi. Ne synojmë të marrim një sulmues të standarteve të larta, që ti përgjigjet më së miri kampionatit shqiptar dhe Kupave të Europës.
Por po shikojmë për përforcime edhe në mesfushë e mbrojtje. Po shikojmë mundësitë, por në këto momente nuk mund të jap emra. Gjithashtu, synojmë të marrim lojtarë dhe nga Akademia, dy apo tre lojtarë. Do punojmë në mënyrë haronike me elementin aktual, me ardhjet cilësore si dhe me prurjet e Akademisë. Ky është plani i përgjithshëm për të konsoliduar klubin”.
Xhaferi ka objektiva të qartë sa i përket pjesëmarrjes në Kupat e Europës.
“Sigurisht që kemi ambiciet tona, është një rikthim i Vllaznisë pas disa vitesh dhe kjo ndoshta është një pikë e dobët, sepse jemi më poshtë se sa të tjerët për shkak të pikavarazhit. Duam të kalojmë sa më shumë ture në Kupat e Europës dhe për këtë nuk duhet të kemi asnjë lloj kompleksi të inferioritetit. Synojmë të kalojë dy ture, por duhet të presim edhe shortin”.
“Deri tani si donator, po si president? Kemi sakrifikuar shumë deri tani, jam i kënaqur për kontributin dhe për atë që kemi arritur. E kam theksuar edhe më parë se privatimimi është celësi i suksesit për vazhdimësinë e ekipit të Vllaznisë. Kompania ime është kualifikuar në këtë proces, kjo është dicka e mirë.
Unë kam bërë një plan biznesi dhe të gjithë e dinë për ambiciet e mia, që përputhen dhe me dëshirat e tifozëve. Besoj se shumë shpejt do përfundojë dhe ky proces dhe Vllaznia të privatizohet, sepse do të jetë në interes të saj. Pengimi i këtij procesi do të jetë në dëm të Vllaznisë dhe sigurisht që ka një kosto”.