Instituti i Studimeve Politike (ISP) ka bërë publik një studim për aktivitetin parlamentar gjatë katër muajve të sesionit të parë të legjislaturës së re që filloi me 10 shtator 2021. Në këtë studim është analizuar efektiviteti parlamentar i çdo deputeti, sipas grupeve parlamentare por edhe qarqeve.
“Një analizë e deputetëve të qarkut Shkodër, si qarku me treguesit më negativë në renditjen e efikasitetit, na lejon të bëjmë diferencën midis deputetëve aktivë (deputetja Koliqi ka nivelin më të lartë me 51 pikë, ndjekur nga Helidon Bushati e Greta Bardeli me nga 47 dhe 33 pikë, ndërkohë që në fundin e listës bëjnë pjesë deputetët e LSI dhe të PSD-së, me nga 5-18 pikë, kuotat më të ulta të përfaqësimit edhe në nivel kombëtar.
Pavarësisht se PSD mori dy mandate dhe LSI vijon të ketë përfaqësim permanent në këtë qark, përfaqësimi i tyre parlamentar ka shënuar rënie edhe në raport me legjislaturën e kaluar, ndërkohë që asnjë nga deputetët e Shkodrës nuk ka pozita të larta drejtuese në Kuvend, në komisione dhe në krye të grupeve parlamentare.”, thuhet në studim.
Në një tjetër paragraf të këtij studimi, konstatohet se qarku Shkodër vijon të ketë deputetët më pak përfaqësues dhe më pak cilësorë, bazuar në aktivitetin e tyre në 4 muajt e parë të Kuvendit.
“Në klasifikimin e deputetëve sipas qarqeve dhe rezultateve të tyre të angazhimit parlamentar gjatë periudhës shtator-dhjetor 2021, rezulton se qarku Shkodër vijon të ketë deputetët më pak përfaqësues dhe më pak cilësorë, – me 24 pikë mesatarisht për deputet, ndjekur nga Durrësi, Kukësi, Lezha dhe Berati. Ndërkohë qarku me nivelin më të lartë përfaqësues është Gjirokastra me 39 pikë, qark i cili 50% të deputetëve të vet i ka gjithashtu ministra.”, thuhet në studimin e ISP- së.
Po ashtu, ka një renditje edhe me deputetët më pak aktivë duke u nisur nga fjalimet që kanë mbajtur në foltoren e Kuvendit. Siç mund ta shihni më poshtë, nga 18 deputetë që nuk kanë mbajtur asnjë fjalim, 5 i përkasin qarkut të Shkodrës: Agron Çela, Benet Beci, Gledis Çeliku, Meri Markiçi dhe Paulin Sterkaj.
Pavarësisht se është në Kuvend për herë të parë, deputetja Emilia Koliqi ka qenë mjaft efikase dhe efektive. Sipas këtij studimi, Koliqi renditet e 12- a ndër 140 deputetët e Kuvendit, sipas kritereve të përcaktuara nga ISP. /ShkodraWeb/
KLIKONI LINKUN KËTU PËR TË LEXUAR TË PLOTË STUDIMIN E INSTITUTIT TË STUDIMEVE POLITIKE – IPS
