Këshilli i Mandateve u mblodh për 5 orë me radhë për të shqyrtuar kërkesën e SPAK për arrestimin e deputetes Belinda Balluku, zv/kryeministre dhe ministre e Infrastrukturës. Mbledhja u mbajt me dyer të mbyllura në prani të drejtuesit të ri të SPAK, Klodian Braho dhe 2 prokurorëve që po hetojnë numrin 2 të qeverisë për shkelje të barazisë në 11 tenderë, Dritan Prençi Dorina Bejko. Pas 5 orëve mbledhje, palët dolën me vendimin që mbledhja të shtyhej, por pa afat.
Kërkesa për shtyrje të mbledhjes u bazua në nevojën për tu njohur me provat që SPAK i ka sjellë Kuvendit se përse kërkon arrestimin e Ballukut, materiale të cilat janë brenda një USB-je ku ndodhen 10 mijë faqe prova, dhe që ende nuk janë lexuar nga askush. Deputetët e të dyja palëve kërkuan të njihen me materialin që kjo USB ka, sikundër edhe avokati i Belinda Ballukut, Ardian Kalija, i pranishëm në mbledhje, krah prokurorëve. Ai tha se duhet të njihet me çdo material në mënyrë që të bëjë mbrojtje efektive dhe për këtë kërkon 3 javë kohë. Por, SPAK thotë se 5 ditë janë të mjaftueshme për tu njohur me dosjen.
Opozita kërkoi ta marrë USB-në me vete dhe ta shqyrtojë, ndërsa socialistët kërkuan që këto materiale të mos dilnin nga mbledhja, por të shikoheshin aty. Në përfundim u vendos që të USB-në do e marrin me vete. PD propozoi të rimblidhen të hënën, ndërsa PS më 19 janar, por pas 20 minutave pushim Niko Peleshi e mbylli mbledhjen pa një vendimarrje se kur do të mblidhen sërish. Opozita hodhi akuza se Peleshi po i jep kohë Belinda Ballukut që të prishë provat.
“Kryetari u kthye dhe tha se për datën do t’ju njoftojë një herë tjetër. Kuptova që, në këto 20 minuta, Rama nuk i ishte përgjigjur. Kuvendi po bëhet pengesë për drejtesine, po i jep kohë Ballukut të prishë provat”, tha Bardhi.
Që në nisje kreu i grupit parlamentar të PD, Gazmend Bardhi, kërkoi që mbledhja të jetë e hapur dhe të marrin pjesë të gjithë deputetët e Kuvendit. Por ishte vetë SPAK që përsëriti përballë tyre, se materialet në dosjen ndaj Ballukut, janë sekret hetimor e si të tilla duhen ruajtur.
10 deputetët anëtarë të Këshillit, 5 nga opozita dhe 5 nga mazhoranca, përfshirë kryeparlamentarin Niko Peleshi, janë njohur deri më tani vetëm me një relacion të SPAK, në të cilin thuhet se ndaj Ballukut ka prova të reja, për të cilat vlerësohet se duhet masë arresti, në burg apo në shtëpi. Prokurorët njoftojnë Kuvendin se Balluku është e pandehur për ndërtimin e tunelit të Llogarasë, është në hetim për 7 lote të Unazës së Madhe në Tiranë, si dhe e dyshuar për 3 tenderë të tjerë, përfshirë koncesionin Thumanë-Kashar të Gener2.
