Nga Klodian ZHIVANI, gazetar
Ishin ditët e para të verës së nxehtë të 2019- ës, rreth orës 18:30 kur parkova përpara kishës së “Shën Kollit” në Shkodër. Isha me vonesë! Mesha dhe ceremonia e pagëzimit të djemve të axhës dhe kushërinjve kishte fillu. Sapo dola nga makina, vuna re në oborrin e kishës shumë policë ndërsa pak ma larg ishin edhe dy furgona policie.
Mendja më shkoi tek ma e keqja por diçka ishte ndryshe. Nuk kishte as shirita që identifikojnë vendin e ngjarjes, as gjak dhe as njerez në panik. Në oborr, takova Sajmir Rrustemin. Nji prej djemve të mirë dhe ma profesionistë që ka policia e Shkodrës. Edhe ky shpesh herë, pasionin e tij dhe dëshirën për nji Shqipni ndryshe, e ka pagu me “fatura” mbi kurrizin e tij. E kuptoi shikimin tem për praninë e policisë në kishë por u përgjigj vetë i pari:
– Ec, ec, futu në kishë se s’ ka gja, – me tha, duke më përshendet.
Aty, në mes të kishës, në nji stol ishte i ulun Anton Martini. Mes familjes Zhivani dhe Martini ka nji lidhje të hershme farefisnore e kumbarie. Dy prej kushërinjve të mi, të cilet atë ditë po pagëzoheshin kishin përzgjedh Antonin si kumbarë. Me shumë dëshirë për të respektu ata, familjen tonë por edhe për të vazhdu lidhjen e kumbarisë, Antoni kishte pranu.
Në zonën tonë të Nikaj- Mërturit, kumbara ka nji rëndësi të veçantë, asht ma ndryshe. Gjyshi më ka tregu se kumbara për ne, asht aq i rëndësishëm, sa në rast fatkeqësie kur famulli humb babën, përgjegjësi për rritjen e tij ka kumbara po aq sa axhat apo dajat.
Sapo iu afrova, nji nga efektivet e policisë më vështroi shtremt por Antoni e la të kuptonte se ishim të afërm. U përshendetëm dhe ndërrume 2- 3 muhabete. Aq sa mundesh në kishë. Më pyeti për familjen, për punën, për kolegët e Shkodrës.
– Ça thotë puna? – e pyeta.
– Si puna jonë por mirë – u përgjigj.
– Prap me polici ti?
– Po, po, gjithmonë – u përgjigj shkurt
– Deri kur ?
Nji buzëqeshje… ishte përgjigjia. Ceremonia mbaroi dhe ai prap iku me eskortë policie. Edhe nji herë tjetër e pata taku në nji dasëm. Edhe aty erdhi me polici. Çfarë jetet!
Në Shkodër e dijnë shumë mirë se si asht kërcënu, po ashtu edhe në Tiranë, Durrës, Elbasan etj., etj. Sot u shkarku Antoni ndërsa në këto qytete, jam i sigurtë se u hap shampanja! U hoq qafet ai që i “bezdiste”… /Publikuar në Facebook/