Më shumë se një herë, Presidenti i Republikës Ilir Meta ka deklaruar se ai “flet me dekrete”. Kur kanë mbetur diçka më pak se 7 muaj nga mbyllja e mandatit, Meta duket se ka ndryshuar qasje. Të paktën lidhur me datën e zgjedhjeve të pjesshme vendor.
Gjatë ditës së sotme, ka reklamuar në rrjete sociale pjesëmarrjen në emisionin “Opinion” të Blendi Fevziut. Deri diku është normale, edhe pse do të duhej që ky emision dhe televizioni ku transmetohet, do të duhej ta reklamonte.
“Sonte, në 22:00, në “Opinion”-in e gazetarit Blendi Fevziu do bëj publike datën e zgjedhjeve të pjesshme lokale, por edhe devizën e 50 viteve të ardhshme në politikë. Malet tona më të larta.”. shkruan presidenti në publikimin e radhës për këtë intervistë.
Po pse tashmë Meta nuk preferon të flasë me dekrete për shqiptarët por me megafon, në kuptimin që mediat, televizionet amplifikojnë “zërin” e kreut të shtetit? A është një intervistë lamtumire si president, në pritje edhe të seancës së 1 shkurtit për shqyrtimin e vendimit të Kuvendit për shkarkim nga Gjykata Kushtetuese?
Serioziteti i momentit por edhe respekti ndaj shqiptarëve, do të kërkonte (siç ka ndodhur deri tani) që Presidenti Meta ta komunikonte dekretin për datën e zgjedhjeve të pjesshme vendore nga Presidenca. Në rastin më të keq, të shpërndante një njoftim për mediat si në rastet e dekreteve të tjera.
Edhe nëse ka lënë firmosjen apo publikimin e dekretit nga studio e “Opinion”, është mungesë e theksuar serioziteti dhe sensit të shtetarit që Meta më shumë se askush, duhet ta demonstrojë. Të ketë nevojë për audiencë të shtuar në këtë moment apo është një “qokë” për shikueshmëri më të lartë për Blendi Fevziun, kjo mund të mësohet vetëm më vonë. Sepse nuk ka shpjegim tjetër logjik për këtë veprim të Metës. /ShkodraWeb/
