DEKLARATË
E UNIONIT TË GAZETARËVE PROFESIONISTË TË VERIUT
Dënojmë me ashpërsinë më të madhe aktin e rëndë të vendosjes së një sasie eksplozivi në banesën e gazetarit Elidon Ndreka në Lezhë pak pas mesnatës së kaluar.
Kërkojmë me vendosmërinë më të madhe, zbardhjen sa më parë të kësaj ngjarje të rëndë si dhe vënien para përgjegjësisë të autorëve të mundshëm të saj.
E konsiderojmë sulm direkt ndaj gazetarëve, mediave dhe lirisë së shtypit, i stimuluar nga situata aspak e zakonshme që po kalon vendi për shkak edhe të klimës politike të acaruar.
Solidaritet dhe mbështetje maksimale për Elidonin dhe çdo gazetar që përmbush me profesionalizëm, përkushtim dhe paanësi misionin e vet, atë të informimit të publikut.
Kujtojmë se garantimi i rendit e sigurisë publike, kushteve normale të punës dhe jetesës, është detyrim kushtetues, ligjor, moral dhe njerëzor, pikë së pari i strukturave të shtetit. Vetëm në orët e para të ditës së sotme, ka patur dy shpërthime, përveç Lezhës edhe një në Vlorë, shenjë se qetësia publike nuk është në nivelet e duhura.
Ekzistenca e një video, që ka fiksuar aktin e rëndë ndaj gazetarit Ndreka dhe familjes së tij, është një mundësi konkrete që ngjarja të zbardhet dhe përgjegjësit të vihen para përgjegjësisë ligjore më të rreptë.
#NukIntimidohemi #meElidonin
UNIONI I GAZETARËVE PROFESIONISTË TË VERIUT
UGPV ALBANIA
SHKODËR
Shkodër, me 30 tetor 2020
Për shpërndarje të menjëhershme
