Polemika mes socialistëve edhe për ngjyrën e ndërtesave shkollore në Shkodër. Ramir Hadëri, drejtor i AKU Shkodër dhe drejtues në strukturat e PS- së, i është përgjigjur në distancë ish- ministrit të jashtëm, Ditmir Bushati, i cili dy ditë më parë, në cilësinë e bashkëpunëtorit të Universitetit të Harvardit, zhvilloi një takim me të rinjtë në Shkodër.
Gjatë fjalës së tij, Bushati u shpreh i habitur edhe për ngjyrën e ndërtesave shkollore në Shkodër, duke shtuar se nuk kanë asnjë lidhje me identitetin e qytetit të Shkodrës. Kësaj deklarate, i është përgjigjur Ramir Hadëri:
Një përgjigje për z. Ditmir Bushati
Nga rrjetet sociale u njoha me disa deklarata të z. Ditmir Bushati gjatë një vizite në Shkodër. Rikthimi i tij në qytet më bëri kurioz, jo aq për atë që tha, por për mënyrën se si zgjodhi ta thoshte.
Në vend që të fliste për punën, për investimet apo për rrugën që po bën sot Shkodra, ai u ndal te boja e shkollave. Ndonjëherë duket sikur, kur mungon thelbi, vëmendja zhvendoset te sipërfaqja, si të gjykosh një shtëpi nga ngjyra e murit dhe jo nga themeli që e mban.
Do të ishte më e ndershme ta dëgjonim z. Bushati, si ish-drejtues politik të qarkut, duke reflektuar për kohën kur kishte përgjegjësi për drejtimin e institucioneve dhe për rezultatet që prodhoi ajo periudhë. Për fat të mirë, politika nuk matet me fjalë të hedhura në një sallë, por me gjurmën që lë në qytet dhe në jetën e njerëzve.
Ne socialistët e Shkodrës nuk jemi kalimtarë në këtë qytet. Jetojmë këtu dhe çdo ditë përpiqemi ta bëjmë më të mirë. Prandaj flasim me krenari për investimet, për ndryshimin dhe për të ardhmen që po ndërtohet hap pas hapi.
Në fund, politika ka një gjykatës të vetëm: qytetarin dhe votën e tij. Ajo është pasqyra më e drejtë e suksesit apo e dështimit të kujtdo që ka pasur përgjegjësi publike.
“Mendja e njerëzve nuk është si stomaku që pranon çdo gatim që i serviret; ajo di të dallojë shijen e punës nga shija e fjalëve.””
