Në kulmin e protestave që vijojnë prej 23 ditësh në Shqipëri, Lëvizja Vetëvendosje ka reaguar zyrtarisht duke mohuar çdo përfshirje si subjekt politik në organizimin apo mbështetjen e tyre.
Qëndrimi është bërë publik nga anëtari i Këshillit të Përgjithshëm të kësaj force politike, Enver Dugolli, i cili sqaroi se çdo mbështetje që vjen nga individë të lidhur me këtë lëvizje është thjesht personale dhe jo e organizuar politikisht.
“Vetëvendosje nuk ka të bëjë asgjë me këtë protestë, thjesht ne, disa aktivistë apo disa njerëz, eksponentë, solidarizohemi me kërkesat e drejta të qytetarëve, shqetësimet e tyre të drejta dhe me kaq mbaron, pra nuk bëhet fjalë që Vetëvendosja nga Kosova apo nga cilado pjesë që ka ndonjë rol të veçantë në këtë protestë”, tha Dugolli.
Njëkohësisht, Dugolli i është përgjigjur edhe deklaratave të kryeministrit Edi Rama, i cili në reagimet e fundit për protestat përmendi edhe emra dhe mbështetës të Vetëvendosjes. Sipas tij, gjuha e përdorur nga kreu i qeverisë shqiptare “nuk i bën nder aspak” dhe se ai po tenton të shmang thelbin e problemit, në vend që të jep llogari te qytetarët.
“Gjuha e përdorur nga Rama për Vetëvendosjen mendoj që nuk i bën nder as atij, thjesht edhe njëherë po e ripërsëris, ai do të duhej që të komunikonte me qytetarët e revoltuar të Shqipërisë, të Tiranës, të gjitha qyteteve edhe të mërgatës, pra do të duhej ai të komunikonte me ta dhe të jepte llogari, edhe të reflektonte karshi kërkesave të tyre.
Nuk ka, s’ka nevojë që të përzihet apo të merret ndonjë shembull i Vetëvendosjes apo ndonjë deklaratë e ndonjë zyrtari të Vetëvendosjes sepse thashë gjithçka ka të bëjë me një solidarizim pra të zyrtarëve të Vetëvendosjes apo të cilitdo subjekt politik që ka të bëjë me solidarizimin me kërkesat që dalin nga kjo protestë, ajo revoltë e qytetarëve”, tha ai, sipas Koha.net.
Kujtojmë se Rama në një nga komentet e fundit për protestat përmendi edhe anëtarë dhe mbështetës të Lëvizjes Vetëvendosje, duke i cilësuar disa prej tyre si të përfshirë në atë që ai e quajti “çorbë dreqërish”. Megjithatë, ai bëri një ndarje mes tyre dhe kryeministrit të Kosovës, Albin Kurti.
“Nuk mund ta bëj e as ta nënkuptoj në asnjë rrethanë përgjegjës Albin Kurtin për asnjë prej sallahanave të Vetëvendosjes që janë përfshirë në këtë çorbë dreqërish”, shkroi Rama.
