Shkruan në Facebook Taulant KOPLIKU, gazetari shkodran i Le Iene në Itali: Shtatë vite më parë nisa një rrugëtim të pamenduar më përpara. Përfshirja në skuadren e madhe të Le Iene, shkonte pertej guximit të një ëndrre. Por jeta më ka mësuar të guxoj fort. Dhe kështu ndodhi.
Në këtë rrugëtim, pavarësisht moshës, larg asaj të një studenti, pata një “shkollë” të një niveli ekselet, me individë të një brumi të pangatërrueshëm të gazetarisë investigative dhe show-t televiziv.
Të bëhesha pjesë e tyre, më dhuroi përveç kënaqësisë të të bërit televizion, edhe atë që mund ta konsideroj si eksperienca e jetës. Por si gjithmonë, çdo fillim e ka një fund.
Ndarjet janë gjithmonë të dhimbshme dhe emocionuese, dhe dita e sotme, si e fundit në këtë shtëpi të dytë, ishte e tillë. Do doja të falenderoja një për një të gjithë ata që më besuan dhe i dhanë vlerë punës time. Janë kaq shumë sa nuk mjafton një postim i vetëm. Sidoqoftë e kam bërë me shtrëngime duarsh dhe përqafime miqsh.
Largimi nga shtëpia Le Iene, është një “goditje” e dyfishtë që shoqërohet dhe me largimin nga Milano drejt Shqipërisë. Për një sfidë të rë, në një ambient të ri, me njerëz të rinj.
Këtë ikje do doja ta konsideroj një mirupafshim dhe jo një lamtumirë. #LeIenePortanoBene (gjithmonë).
