Shuhet doktor Shahin Kadare, vëllai i shkrimtarit Ismail Kadare, themelues i PD dhe ambasador në Suedi…

Doktor Shahin Kadare, vëllai i shkrimtarit të njohur Ismail Kadare, eshtë ndarë nga jeta, sot në orët e para të mëngjesit, pas një beteje më pak se njëvjeçare me një sëmundje të rënde.

Familjarët e tij kanë konfiermuar këtë të mërkurë lajmin e ndarjes nga jeta të të shtrenjtit të tyre, mjekut Shahin Kadare.

“Me hidherim njoftojme ndarjen nga jeta te te dashurit tone Shahin Kadare. Varrimi behet diten e enjte, dt 18. 11. 2021, ora 12.00 ne Tufine. Ceremonia mortore do te zhvillohet ne ambientet e Funerale Home ALBA 2000, rruga e Dibres, Nr. 302, prane Medresese, te merkuren ora 15.00- 20.00 dhe te enjten ora 9.00- 12.00. Vizitat do te zhvillohen diten e premte deri te dielen, paradite nga ora 10.00 – 13.00 dhe mbasdite nga ora 16.00 – 20.00 ne ambjentet e Piazza.”

Ai është një nga të parët doktor të Shkencave në fushën e mjekësisë, me një kontribut të jashtëzakonshëm në studimet onkologjike, si referues në dhjetëra konferenca dhe kongrese ndërkombëtare shkencore. Ai ka botuar studimet e tij shkencore në revistat më të njohura të mjekësisë në botë.


Doktor Shahin Kadare fillimisht u diplomua në vite ’60 në Tiranë dhe më pas kreu një specializim në Rumani. Ndershmëria, përkushtimi dhe profesionalizimi i tij, e kthyen atë në një autoritet të padiskutueshëm shkencor në fushën e onkologjisë.

Ai është themelues i Laboratorit të Morfologjisë Patologjike dhe ka luajtur një rol kyç në zhvillimin e kësaj dege të mjekësisë në Shqipëri, përmes diagnostifikimit mikroskopik të tumoreve. Ai arriti të krijoje në bashkëpunim me kirurgët shqiptarë të kohës, skemën e trajtimit operativ të tumoreve, duke verifikuar rrezikshmërinë e tyre qysh gjatë operacionit.

Kadare është një nga themeluesit e Partisë Demokratike në vitin 1990, dhe një nga kritikët e parë të mëdhenj të lidershipit të saj si refuzues i autoritarizmit post-komunist. Shahin Kadare shërbeu për disa vite, pas vitit 1997 si ambasador i Shqipërisë në Suedi dhe vende të tjera, por iu rikthye sërisht profesionit të mjekut.

Doktor Shahin Kadare është vëllai i shkrimtarit të madh Ismail Kadare, me të cilin pat ndërtuar një raport të rrallë njerëzor dhe intelektual.

Ai ishte adhurues i madh intelektual i tij, lexuesi më i madh i tij, kritiku më pa drojë i jetës dhe veprës së tij dhe mbështetësi më i madh në jetën e tij. Së bashku me gruan dhe fëmijët e tij, ndërtuan një raport familjar dhe njerëzor, që e bëri Familjen Kadare më të madhe dhe më të fortë.

Shqipëria është zgjuar sot më e pikëlluar dhe natyrisht më pak e shëndetshme, pa Doktor Shahin Kadarenë.

Open

Close