Një bombul gazi ka shpërthyer këtë të shtunë në lagjen Vasil Shanto. Sipas informacioneve të policisë, ngjarja ka ndodhur rreth orës 11.35 në mjediset e një biznesi, lokal. Nga shpërthimi, nuk ka patur persona të dëmtuar.
Sipas informacionit zyrtar të policisë së Shkodrës, ka nisur procedimi penal për një 17- vjeçar, banues në Shkodër, pasi u kap duke drejtuar automjetin, pa leje drejtimi.
Ndërkohë, në Vaun e Dejës, një shtetas gjerman 77 vjeç, duke drejtuar motomjetin e tij, ka humbur kontrollin mbi drejtimin e motomjetit dhe si pasojë është rrëzuar. 77-vjeçari, po merr mjekimin në Spitalin Rajonal Shkodër, jashtë rrezikut për jetën.
Po ashtu, nga policia e Vau dejësit, nisi procedimi në gjendje të lirë për dy shtetas respektivisht 45 vjeç dhe 27 vjeç, pasi për motive të dobëta kanë debatuar dhe kanosur me fjalë njëri – tjetrin.
Policia në Velipojë, ka referuar materialet në Prokurori për vlerësim pasi ka bërë kallëzim një shtetase, 30 vjeçe, banuese në Velipojë, pasi ditën e premte ka telefonuar shërbimin zjarrfikës në lidhje me një zjarr që kishte rënë afër banesës së saj dhe operatori i zjarrfikëses është përgjigjur jashtë etike dhe me fjalë fyese.
Së fundi, Policia e Shkodrës referoi materialet në Prokurori për vlerësim për një shtetas 62 vjeç, banues në fshatin Drisht, pasi ka bërë kallëzim një shtetas 60 vjeç, se 62-vjeçari i ka hedhur një sasi inertesh në hyrjen e një sipërfaqeje ndërtimi për të cilën ka një vendim për pezullimin e punimeve nga IMT Shkodër.
