Kryetarja e PD- së Shkodër, Eliona Shkreli, ka shpërndarë në rrjetet e saj sociale disa video dhe foto, përmes të cilave ajo mbështet idenë se Bashkia Shkodër po shpërndan koncentrat në njësitë administrative për fushatë.
“Në fshatrat e Njësive Administrative të Shkodrës ka filluar shpërndarja e koncentratit falas për bagëti të cilat shpërndahen nga kamionë pa asnjë logo, i dorëzohen kryepleqve të fshatrave të emëruar nga Benet Beci dhe pastaj kryepleqtë i shpërndajnë nëpër familje të komuniteteve që përfaqësojnë! Pamjet e postuara janë të fshatit Kuç të Njësisë Administrative “Gur i Zi” por disa ditë më parë e njëjta skemë është aplikuar edhe në fshatrat e Njësisë Administrative “Postrribë”! Siç shihet nga pamjet e siguruara nga banorë të zonës që kanë denoncuar rastin, rilindasit kanë filluar blerjen e votës përmes skemave skandaloze për të deformuar rezultatin e 11 majit në favor të tyre!”, shkruan ndër të tjera kryetarja e PD- së Eliona Shkreli.
Nuk ka vonuar as edhe reagimi, por përmes selisë së PS- së Shkodër, e cila në rrjetet sociale, ka hedhur edhe disa foto, lidhur me incidente të PD- së në zgjedhje të kaluara.
“PD vazhdon me mashtrime dhe spekulime – e vërteta është krejt ndryshe! Ta harrojë Partia Demokratike e Shkodrës që mund të bëjë krahasime me Partinë Socialiste! Në zgjedhjet e vitit 2023, Partia Demokratike përdori Bashkinë e Shkodrës dhe punonjësit e saj për blerje votash. Partia Demokratike edhe një herë po tregon fytyrën e saj të vërtetë: keqinformime, shtrembërime dhe spekulime të ulëta për të manipuluar qytetarët e Shkodrës. Shpërndarja e koncentratit është një procedurë e rregullt, në kuadër të emergjencave civile, funksion i bashkive, dhe çdo insinuatë tjetër është thjesht një përpjekje e dëshpëruar për të krijuar konfuzion dhe për të mashtruar opinionin publik. Për sa i përket rastit në fjalë, ekziston edhe dokumenti përkatës, i cili është publik dhe shpjegon qartë procedurën ligjore të ndjekur. Në mungesë të vizionit dhe zgjidhjeve për qytetin, PD ka zgjedhur rrugën e gënjeshtrës dhe propagandës boshe. Shkodranët e dinë mirë kush punon për ta dhe kush merret vetëm me shpifje!”, thuhet në reagimin e PS- së Shkodër.
