Shpallen në kërkim djemtë e ish- deputetit të Shkodrës, goditën me sende të forta një person, bënë sherr me policinë

Dy djemtë e ish-deputetit Tom Doshi janë shpallur në kërkim pasi akuzohen se kanë plagosur me sende të forta një person, dhe më pas kanë kundërshtuar punonjësit e policisë. Markos dhe James Doshi, të cilët jaë përfshirë në një sherr dhe më tej kanë goditur punonjësit e policisë, duke u larguar më pas nga vendngjarja.

Burime bëjnë me dije se ngjarja ka ndodhur në zonën e ish-Bllokut, ndërkohë që dy djemtë e ish-deputetit tashmë janë shpallur zyrtarisht në kërkim. Në njoftimin zyrtar të policisë thuhet se vëllezërit Doshi kanë rrahur 38-vjeçarin me inicialet R.S.


“Specialistët për Hetimin e Krimeve në Komisariatin e Policisë Nr. 2 bënë arrestimin në flagrancë të shtetasit E. L., 34 vjeç, banues në Tiranë, për veprat penale “Goditja për shkak të detyrës”, “Plagosja e lehtë me dashje” dhe “Prishja e qetësisë publike”.

Gjithashtu, shpallën në kërkim për veprat penale “Plagosja e rëndë me dashje”, “Goditja për shkak të detyrës”, “Kundërshtimi i punonjësit të Policisë së rendit publik”, “Mosbindja ndaj urdhrit të punonjësit të Policisë së rendit publik” dhe “Prishja e qetësisë publike”, të kryera në bashkëpunim, shtetasit M. D., 20 vjeç dhe J. D., 22 vjeç, të dy banues në Tiranë.

Këta 3 shtetas, gjatë një konflikti për motive të dobëta, në rrugën “Ismail Qemali”, kanë goditur me sende të forta shtetasin R. S., 38 vjeç, dhe më pas nuk i janë bindur urdhrave të punonjësve të Policisë, për të ndaluar, por i kanë kundërshtuar ata, duke i goditur për shkak të detyrës. Shtetasi E. L. është vënë në pranga, ndërsa shtetasit M. D. dhe J. D. janë larguar. Vijon puna për kapjen e tyre“, njoftoI policia e Tiranës pa dhënë detaje të mëtejshme.