Primo Shllaku, një emër shumë i rëndësishëm i kulturës dhe artit shqiptar, feston sot ditëlindjen. Një personalitet që i bën nder Shkodrës e Shqipërisë, ai spikat si shkrimtar, poet, përkthyes, mësimdhënës, promovues i gegnishtes dhe vlerave të saj.
Primo Shllaku u lind në Shkodër më 16 dhjetor të vitit 1947. Shkollën fillore e kreu në qytetin e lindjes. Pasi mbaron studimet në Universitetin e Tiranës për Gjuhë-Letërsi shqipe, me propozim të Pr. Dr. Eqerem Çabej, emërohet pedagog pranë këtij universiteti, por më pas emërimi anulohet.
I propozohet një vend në Institutin e Lartë Pedagogjik të Elbasanit-sot Universiteti A. Xhuvani, por ai detyrohet të refuzojë për arsye se familja e tij transferohet në Shkodër. Punon si mësues në zonën e Shllakut -Shkodër, prej aty në shkollën pyjore e më pas në atë industriale. Bir i regjisorit, “Artistit të Popullit” Lec Shllaku, vëllai i aktorit Bruno Shllaku dhe nip i përkthyesit të famshëm Gjon Shllaku, në fillim të viteve ’90, Primo jetoi dhe punoi si mësues frëngjishteje në Greqi.
Prej shumë vitesh, ai është zhvendosur në Tiranë, duke dhënë kontribut përveç mësimdhënies, edhe si shkrimtar, përkthyes dhe promovues i përfshirjes së vlerave të gegnishtes në Shqipen Standarde. Ndër veprat më të rëndësishme të tij janë vëllimet poetike “Lule nate” dhe “Hana e njelmët e ditës”.
Primo Shllaku është vlerësuar me mjaft çmime për krijimtarinë e tij, teksa ka qenë pjesë e shumë jurive profesionale të artit, kulturës, letërsisë e gjuhësisë. Ai është një personalitet me vlera të shumanëshme, puna dhe krijimtaria e të cilit, ka lënë tashmë gjurmë për sot por edhe për nesër.
