Flamur Noka, sekretar i përgjithshëm i PD- së ka qenë i ftuar i gazetarit Blerti Delija në emisionin “Tonight” në Star Plus. Ai ka folur për zhvillimet politike në vend, duke u ndalur edhe tek ato brenda vetë PD- së.
“Ne jemi të prirur drejt bashkimit jo vetëm të gjithë demokratëve, aleatëve, shoqatave apo individëve, të gjithë atyre që nuk e duan më regjimin e Edi Ramës”, ka thënë Noka në përgjigje të pyetjeve.
Ai ka thënë se opozita po krijon frymë, duke paralajmëruar edhe protestat që sipas tij, do të organizohen shumë shpejt. “Nuk ka rëndësi data, rëndësi ka që shqiptarët janë ndërgjegjësuar dhe po reagojnë, siç është edhe protesta e pedagogëve. PD do të mbështesë protestat, do ti udhëheqë ato kundër regjimit”, ka thënë Noka.
Duke folur për zgjedhjet vendore të vitit të ardhshëm, Noka ka evidentuar dy të veçanta të ofruara për demokratët e shqiptarët. “Kandidatët do të zgjidhen përmes primareve. Jo vetëm kaq. Me 4 dhjetor 2022, shqiptarët do të njohin emrat e kandidatëve të opozitës për kryebashkiakë të vendit”, ka shtuar ai.
Lidhur me qarkun e Shkodrës, Noka ka bërë parashikimin e tij. “Përveç Shkodrës, edhe 4 bashkitë e tjera të qarkut, do të jenë blu. Do të fitohen nga Partia Demokratike, aleatët e saj”, ks shprehur sigurinë numri 2 i PD- së.
“Shkodra nuk diskutohet. Është rënë dakort me aleatët që Shkodra do të jetë e PD- së. Në këtë bashki, kandidati do të jetë nga PD- ja. Ndërkohë, tani për tani dihet se kryetari aktual Bardh Spahia, është automatikisht kandidat për primare, pa kaluar filtrat që duhet të kalojnë kandidatët e tjerë”, ka shtuar Noka. /ShkodraWeb/
