Kënga ‘Zjerm’ e cila po përfaqëson Shqipërinë në “Eurovision 2024”, e kënduar nga grupi “Shkodra Elektronike” po bën bujë.
Ajo është renditur mes 20 performancave më të klikuara në kanalin zyrtar të Eurovision Song Contest në YouTube për muajin prill. Lajmi u bë publik nga vetë Eurovision-i, i cili çdo muaj publikon një përmbledhje të videove më të ndjekura, ku përfshihen klipet zyrtare, performancat live dhe ato nga finalet kombëtare. Në njoftimin e tyre thuhet se renditja bazohet në shikimet brenda muajit kalendarik, duke filluar nga janari i vitit 2020. Dhe prilli i 2025-ës i përket “Zjerm”-it!
Me ritmet elektro-folk dhe estetikën e pazakontë, duket se “Shkodra Elektronike” nuk ka ndezur vetëm skenën, por edhe ekranet e miliona shikuesve. “Shkodra Elektronike” ka rrëmbyer vëmendjen e publikut ndërkombëtar me këngën e tyre “Zjerm”, duke u renditur në vendin e parë në sondazhin më të fundit të organizuar nga portali i njohur i fansave të Eurovisionit, Wiwibloggs. Sipas të dhënave të publikuara nga Wiwibloggs, në sondazhin e zhvilluar pas publikimit të këngëve pjesëmarrëse në mars, kanë marrë pjesë 18,951 votues. Shkodra Elektronike ka grumbulluar 2,106 vota, që përbëjnë 11.11% të totalit, duke lënë pas konkurrentë të fortë si Finlanda dhe Suedia. Ky rezultat i jashtëzakonshëm vjen në një moment kyç, ndërsa provat për Eurovision 2025 pritet të nisin së shpejti në qytetin mikpritës, Bazel.
Me 37 artistë nga vende të ndryshme të Evropës dhe përtej saj që garojnë për çmimin e madh, mbështetja e fortë nga publiku është një sinjal i qartë se Shqipëria është një pretendente serioze për fitoren. Wiwibloggs, një platformë e themeluar në vitin 2009 nga gazetari William Lee Adams, është bërë një nga burimet më të besueshme për lajme, analiza dhe sondazhe të dedikuara për Eurovision-in, me miliona ndjekës në mbarë botën. Ndërsa emocionet rriten dhe pritshmëritë janë të larta, Shqipëria hyn në fazën e provave me një status të ri: si pretendentja kryesore për fitoren në Eurovision 2025. Me “Zjerm” që ndez zemrat e publikut dhe kritikëve, “Shkodra Elektronike” është gati të shkruajë një kapitull të ri në historinë e muzikës shqiptare në skenën ndërkombëtare.
Kënga ‘Zjerm’ e kënduar nga ‘Shkodra Elektronike’ është shpallur fituese e edicionit të 63-të të Festivalit të Këngës dhe do të përfaqësojë Shqipërinë në Eurovision 2025. Performanca e “Shkodra Elektronike mori vlerësime të shumta si nga juria dhe nga vota e publikut dhe diaspora dhe grumbulloi 143 pikë në total. “Shkodra Elektronike” është një grup muzikor i përbërë nga dy emigrantë shqiptarë të rritur në Itali, shumë larg qytetit të tyre, Shkodrës. Grupi është krijuar nga kantautori-producenti Kolë Laca dhe kantautorja Beatriçe Gjergji. “Shkodra Elektronike”, një duet elektronik, shqiptare me banim në Itali, bëjnë ri-interpretim modern të këngëve tradicionale shkodrane.
