Shkarkohet Enkelejd Alibeaj, Kuvendi i PD- së ngarkon Këshillin Kombëtar për zgjedhjen e kryetarit të Grupit Parlamentar

Kuvendi Kombëtar i PD-së i thirrur nga Komisioni i Rithemelimit ka njoftuar ditën e sotme se Enkelejd Alibeaj nuk do të jetë më kryetari i Grupit Parlamentar të Partisë Demokratike.

Kryetari i Kuvendit Kombëtar, deputeti Belind Këlliçi njoftoi se posti i kryetarit të Grupit të Parlamentar të PD-së konsiderohet si vakant për shkak se Partisë Demokratike i mungojnë tashmë nënkryetarët e saj.

Vendimi u hodh në votim dhe u ngarkua Këshilli i Ri Kombëtar i PD-së për zgjedhjen e kreut të Grupit të PD-së.

“Në mbështetje të statutit të Partisë Demokratike, për organizimin dhe funksionimin e grupit parlamentar të PD, me propozim të Rithemelimit, Kuvendi vendosi të konstatojë vakancën e kryetarit të grupit parlamentar të PD. Ngarkohet Këshilli Kombëtar për zgjedhjen”, tha Këlliçi.

Ndërkohë që më herët Kuvendi i thirrur nga Komisioni i Rithemelimit njoftoi se më datë 22 maj do të mbahen zgjedhjet për kryetarin e ri të Partisë Demokratike.