Shqipëria ka pësuar humbjen e tretë radhazi në Ligën e Kombeve për femra dhe është shumë pranë rënies në Ligën C të UEFA-s për këtë kompeticion. Vajzat kuqezi janë mposhtur sot në takimin e Ligës B në Shkodër me shifrat 0-1 nga Irlanda, në një takim që është zhvilluar në kushte jo edhe aq të përshtatshme.
Shiu që ka rënë në Shkodër bëri që terreni i stadiumit “Loro Boriçi” të ishte thuajse i papraktikueshëm në startin e sfidës që u shty me një orë pikërisht sa të largohej sasia e ujit mbi terren. Megjithatë kjo penalizoi zhvillimin normal të ndeshjes ndaj skuadrës që kryesonte grupin dhe vinte më pikë të plota në këtë përballje.
Vajzat kuqezi rezistuan deri në fund, por pësuan golin pikërisht në minutën e 88 të takimit, duke regjistruar humbjen e tretë radhazi në 4 ndeshje të luajtura e duke mbetur në vendin e fundit me vetëm 1 pikë në grupin e tyre në Ligën B. Sipas rregullores, vendi i fundit të zbret direkt në Ligën C, ndërsa vendi i tretë në grupin ku bëjnë pjesë edhe Hungaria e Irlanda e Veriut, çon në play-off për mbijetesën.
