Sali Berisha të shtunën pasdite në Shkodër, prezanton zyrtarisht kandidatin zyrtar të “Shtëpia e Lirisë” Bardh Spahia

Sali Berisha do të jetë sërish në Shkodër. Mësohet se lideri historik i PD- së do të vijë në Shkodër për prezantimin zyrtar të kandidati për kryetar të Bashkisë së Shkodrës Bardh Spahia i koalicionit “Shtëpia e Lirisë”.

Berisha pritet të zhvillojë takimin e tij jo në ambjent të mbyllur por në sheshin para Bashkisë Shkodër, ku pritet të ketë një pjesëmarrje të gjërë të antarëve e simpatizantëve të PD- së, mbështetësve të ish- kryeministrit Berisha dhe lëvizjes së tij politike si dhe të kandidatit Bardh Spahia. Berisha do të shoqërohet nga antarë të Komisionit të Rithemelimit të PD- së, deputetë e figura të spikatura në historinë 31 vjeçare të Partisë Demokratike.


Paraprakisht, është vendosur që tubimi të nis rreth orës 15.00 dhe do të ketë pamjen e një feste me disa elementë. Brenda pak muajve, është hera e tretë që ish- kryeministri Berisha vjen në Shkodër, në atë që konsiderohet prej 31 vitesh si bastioni i Partisë Demokratike.

Siç dihet, Bardh Spahia rezultoi më i votuari në primaret e PD- së, ku përballë 5 kandidatëve të tjerë, arriti të sigurojë mbi 2/3 e antarëve të PD- së që morën pjesë në votim. Sali Berisha ka deklaruar se kandidati Spahia do të fitojë garën për Bashkinë e Shkodrës, teksa ka bërë thirrje që të gjithë demokratët, të djathtët por edhe qytetarët e tjerë, ti bashkohen koalicionit “Shtëpia e Lirisë” me 6 mars 2022. /ShkodraWeb/