Procesi i zgjedhjes së administratorit të ri të Universitetit “Luigj Gurakuqi” të Shkodrës, duket se nuk është mbyllur akoma. ShkodraWeb ka mësuar se një nga 3 kandidatët që ishin pjesë e garës, do të ankimojë vendimin e marrë nga Bordi i Administrimit në mbledhjen e 2 prill 2026 për zgjedhjen e administratorit z. Mark Molla.
Sipas burimit që i referohet ShkodraWeb, kandidati që do të ankimojë vendimin, fillimisht do të shfrytëzojë hapësirën e ankimimit administrativ pranë Bordit të Administrimit, brenda 5 ditëve të punës nga momenti i shpalljes së vendimit për fituesin. Në vijim, paralajmërohet edhe ankimim në Gjykatën Administrative për vendimin e marrë nga Bordi i Administrimit.
Ndërkohë, ShkodraWeb ka siguruar edhe një dokument, me 5 pyetje të rektorit Tonin Gjuraj, shpërndarë ditën e mbledhjes së 2 prill 2026, 7 anëtarëve të Bordit të Administrimit, të cilave nuk iu përgjigjën edhe pse mbledhja zgjati rreth 5 orë dhe kishte kohë të mjaftueshme. Po ashtu, burime të besueshme paralajmërojnë një dalje për mediat të rektorit Gjuraj, për të sqaruar pozicionin e tij lidhur me procesin e përzgjedhjes së administratorit nga Bordi i Administrimit. Ndërsa, burime nga UNISHK bëjnë me dije se pritet të ketë reagim edhe nga trupa e pedagogëve por edhe studentë lidhur me vendimmarrjen e Bordit të Administrimit.
Mbledhja e Bordit të Administrimit për zgjedhjen e administratorit të ri, u bë pa praninë e mediave. Fillimisht, nisur nga interesi i procesit, ato ishin të pranishme por me vendim të Bordit të Administrimit, nuk u lejua futja e tyre në sallën e mbledhjes. Informacionet që kanë rrjedhë në media, nuk janë zyrtare por të nxjerra nga anëtarë të Bordit të Administrimit.
Zgjedhja e administratorit të ri të UNISHK, është kthyer tashmë në një sagë, prej të cilës nuk përfiton askush, ndërsa është e sigurtë, se të paktën në imazh, humbet pikërisht ky IAL. Polemikat e hapura publikisht, përfshirja direkte e titullarëve të arsimit të lartë si dhe aludimet për ndikim politik në këtë proces, kanë krijuar një atmosferë aspak pozitive për UNISHK, edhe në kuadër të përgatitjeve për vitin e ri akademik, ku synohet tërheqja e një numrë më të lartë studentësh se vitet e kaluara. /ShkodraWeb/
