Prej disa orësh, në rrjetet sociale tifozët dhe grupet e tyre, kanë shprehur shqetësim për rritjen epapritur të çmimit të biletave për derbin Tirana- Vllaznia. Bëhet fjalë për tifozë të Vllaznisë, të cilët janë organizuar përmes rrjeteve sociale për të qenë sa më të shumtë në mbështetje të ekipit të zemrës.
Pavarësisht se çmimi zyrtar i publikuar për biletat në tribunën që u është lënë në dispozicion tifozëve kuqeblu ishte njoftuar edhe nga KF Vllaznia me 400 lekë, ata që i kanë blerë u është dashur të paguajë 600 lekë ose 200 më shumë. Por situata është sqaruar nga zëdhënësi i KF Vllaznia sh.a. Gjergj Kola, përmes një shënimi në rrjete sociale.
“Përshëndetje. Sa për sqarim: Biletat edhe në tribunën V103 e kanë çmimin 400 lekë. Kjo shihet edhe tek njoftimi i postuar nga KF Vllaznia por edhe nga KF Tirana. Dje po më thonë se ka ndodhur një gabim nga kompania që shet biletat pikërisht për këtë tribunë duke i shitur 600 lekë. Kontaktova me to dhe po korrigjohet gabimi. Sot në orën 17.00 kur të hapet sporteli, çmimi i biletave do të jetë sërish 400 lekë edhe për këtë tribunë.
Po ashtu, njoftoni ata që kanë blerë biletat me çmimin 600 lekë, të shkojne e t’i kthejnë dhe të marrin biletat e tjera me çmimin 400 lekë ose diferencën e çmimit. Ky është njoftimi që sapo mora nga kompania që shet biletat.”, shkruan zëdhënësi Kola.
Tashmë që është zgjidhur edhe ky problem, shpresojmë dhe urojmë që tifozët e Vllaznisë të jenë të shumtë në mbështetje të ekipit të zemrës në ndeshjen me Tiranën. Forca Vllaznia! /ShkodraWeb/
