Gjatë muajit korrik numri i pushuesve të prekur nga Covid-19 është rritur ndjeshëm në Velipojë dhe në Rrjoll. Mjeket e qendrave verore shëndetësore tregojnë se kryhen çdo ditë me dhjetëra teste të shpejta.
“Sot kemi bërë 15 tamponë, 11 kanë dalë pozitivë! Kur pushuesit kanë shenja të lehta izolohet në shtëpi apo hotelin ku janë akomoduar, ndërsa kur kanë komplikacione i dërgojmë në qendra më të specializuara”, tha Elvana Rrogami, mjeke e qendrës verore shëndetësore Velipojë.
“Jemi në kohë pandemie, bëjmë çdo ditë tamponë dhe rastet qe dalin pozitiv me tamponë lidhemi me DSHP dhe raportohen si raste Covid”, u shpreh Eliesa Bekteshi, mjeke e qendrës verore shëndetësore në Rjoll.
Qendrat shëndetësore verore që operojnë përgjatë zonës turistike Velipojë –Rrjoll përpos rasteve Covid-19 përballen dhe me fluks të shtuar të pacienteve me simptoma të helmimit, pickimeve e tensionit të lartë arterial.
Ndërkohë, edhe epidemiologu i Vlorës Agron Bashllari tha se ka 250 testime që kryhen në ditë, gjysma e rezultojnë pozitiv.
