Ka përfunduar procesi i rinumërimit të votave për qarkun e Tiranës. Pas rreth një jave proces rinumërimi i mbushur me tensione e akuza në lidhje me lëvizjet e votave ndërmjet kandidatëve, tashmë ky qark ka treguar se rezultati ka mbetur i pandryshuar, si për subjektet politike, edhe për renditjen e kandidatëve.
Në një deklaratë për medie nga Pallati i Sportit “Farie Hoti”, anëtarët e KAS Koli Bele e Ledio Braho kanë hedhur poshtë pretendimet për trafik votash, duke theksuar se numri i vogël i lëvizjeve është tregues se kemi të bëjmë me gabime njerëzore.
“Procesi ka qenë korrekt dhe ka prodhuar rezultate në kohë reale me nivel transparence. Procesi ka qenë strapacues. Në mënyrë të panevojshme po numërohet nga një administratë civile.
Duhet të jemi të kujdesshëm para se të themi se komisionerët kanë trafikuar vota. Në situatën e një qendre numërimi ndodhin gabime. 280 vota apo 100 vota, emrat e kandidatëve ne tiranë janë të pandara me kuadrate. Ose gabime në lidhje me madhësinë e fletës. Tipologjitë e votimit ka persona që kanë bërë gabime. Në 1.200 kuti pse kanë lëvizur 200 vota, nuk ka të bëjë më trafikim votash”, tha Bele.
Nga ana e tij, Braho theksoi se nuk ka pasur lëvizje të konsiderueshme votash në qarkun e Tiranës. Ai shtoi se, vlen të theksohet se qëndrimet e kandidatëve pas rihapjes së kutive, kanë ndryshuar duke i shërbyer procesit.
“Nuk ka pasur lëvizje të konsiderueshme votash që të bëjnë pis procesin. Është e rëndësishme që të shohim qëndrimet e disa kandidatëve kanë ndryshuar pas rihapjes së kutive dhe kjo i ka shërbyer procesit. Nuk ka më akuza për trafikim votash, lëvizjet që konsiderohen si vjedhje nuk janë të tilla, janë gabime njerëzore që kanë ndodhur në numërim.
Procesi ka një numër të konsiderueshëm hallkash, hedhje në sistem. Për shkak të numrit të madh të kandidatëve në Tiranë nga lodhja ndodhin gabime”, deklaroi Braho.
Ishte kërkesa e Partisë Demokratike–Koalicioni për Shqipërinë Madhështore, që të zhvillohej procesi i rinumërimit, me pretendimin se kishte pasur parregullsi dhe se kërkonin të merrnin mandatin e 14-të, por ka qenë ky subjekt politik që ka humbur më shumë vota. PD-ja gjatë rinumërimit humbi 612 vota, PS 380, ndërsa Partia Mundësia, 44 vota më pak sesa shifrat e para të numërimit.
Edhe sa i përket kandidatëve, një pjesë e të cilëve nisën betejën ligjore për rinumërimin, rezulton se ka pasur devijime votash. Sipas të dhënave të KQZ-së, nga demokratët më shumë vota pa meritë ka marrë Jorida Tabaku, ndjekur nga Ilir Alimemeti. Tabakut do t’i zbriten nga tabela perfundimtate 250 vota dhe Ilir Alimehmetit, 137 vota.
Ndërkohë, Ilir Meta rezulton se ka marrë 61 vota pa meritë. Sa i përket Partisë Socialiste, i pari me më shumë vota të pamerituara ka rezultuar ministri Ervin Hoxha me 296 të tilla. Ai ndiqet nga Fatmir Xhafaj me 232 vota pa meritë, 128 për Xhemal Qefalian, 172 rezulton se ka edhe Erion Braçe, i cili ka shprehur pakënaqësi për rinumërimin dhe KAS-in, duke e akuzuar këtë të fundit se i ka shpallur votat e pavlefshme. Olta Xhaçka ka rezultuar me 50 vota pa meritë, Blerina Gjylametit i janë shtuar 19 vota nga numërimi i 11 majit, por sërish nuk do të mundet ta përmbysë diferencën e ngushtë që ka me kolegen e saj socialiste.
