Reshjet e shiut kanë bërë që të nisin shkarkimet intensive në tre hidrocentralet e kaskadës së lumit Drin. Në Fierzë shkarkimet janë 1000 m3/ sekondë, Koman 800 m3/ sekondë dhe në Vaun e Dejës 800 m3/ sekondë.
Nivelet në liqenet e Kaskadës së Drinit janë relativisht të larta, si pasojë e reshjeve të shiut dhe e prurjeve shumë të larta hidrike. Këto prurje rezultojnë të jenë në vlerat më të larta të mesatares shumëvjeçare të regjistruar.
Aktualisht kapacitet rezervuese të liqeneve të kaskadës së Drinit janë në limitet e tyre dhe për këtë arsye jemi të obliguar të mbajmë në kuota disi të larta në shkarkime, në raport me prurjet e shumta hidrike në kaskadë.
Sidoqoftë këto shkarkime nuk janë asnjëherë më të larta se prurjet natyrore. Konkretisht është shkarkuar 70 – 90 përqind % e prurjeve ujore në kaskadë, shkarkime këto që në orët në vazhdim do të vijnë duke u reduktuar.
KESH po menaxhon me kujdes situatën e rënduar hidrike, me qëllim minimizimin e rrezikut nga përmbytjet në zonën e nën Shkodrës. Korporata Elektroenergjitike do të mbajë të informuar në mënyrë transparente opinionin publik si dhe autoritetet lokale dhe qendrore.
