Ndërsa ka përfunduar zyrtarisht numërimi i votave, PS në Malësinë e Madhe ka regjistruar një fitore të thellë: 1 nga 2 banorët e kësaj treve kanë votuar këtë forcë politike ose 48.28 % të totalit të votave. Padyshim, është meritë e kryebashkiakut Tonin Marinaj, si drejtues i fushatës, i cili prej 3 mandatesh radhazi, ka marrë votat e malësorëve për të qeverisur në nivel lokal.
Shifrat janë kokëforta, teksa PS ka fituar në të gjitha njësitë administrative përbërëse Gruemirë, Kastrat, Kelmend, Koplik, Qendër dhe Shkrel. Pra, i bie që PS në Malësi të Madhe, ka humbur vetëm në disa qendra votimi. Në fakt, edhe ky rezultat është në vazhdën e atij të marrë nga Tonin Marinaj në 2023 për zgjedhjet vendore.
Përballë Isa Ramaj, Marinaj mori 57.1% të totalit të votave ose mbi 9157 vota nga 14.237 votues. Dhe kjo, në mandatin e tretë radhazi, duke patur përballë 3 rivalë të ndryshëm. Pavarësisht sulmeve që iu bënë për ta dëmtuar edhe në prag të kësaj fushate, pavarësisht “goditjeve poshtë brezit” nga kundërshtarët politikë, besimi i malësorëve tek kryebashkiaku i tyre, vazhdon të jetë në nivele të larta edhe pas dy viteve nga votëbesimi i tretë.
Në nivel qarku, Malësia e Madhe është e vetmja bashki ku PS jo vetëm ka fituar por fitorja ka përmasa të thella dhe merita duhet ti njihet sigurisht, kryebashkiakut Tonin Marinaj. Shkodra, Puka, Fushë- Arrëzi u fituan nga PD, ndërsa Vau dejësi u fitua nga PSD- ja.
