RAPORTI SEKRET I POLICISË/ Grabitja e 6,5 mln euro në rinas, uniformat blu: U njoftuam 5 minuta me vonesë…

Në raport jepen në mënyrë kronologjike, me orar të saktë, të gjitha lëvizjet e grabitësve, por edhe veprimet e mosveprimet e kompanisë së sigurisë në aeroport. Ndërsa theksohet se Policia është njoftuar 5 minuta e 20 sekonda me vonesë, pasi kishte ndodhur ngjarja. Nga ana tjetër, TIA, duke përmendur deklaratën e dhënë të nesërmen pas ngjarjes, shprehet se pretendimet e Policisë janë të pavërteta, duke qenë se njoftimi është dhënë në kohë.

Dokumenti mbështetet në të dhënat e referuara nga Policia e Shtetit, Autoriteti i Aviacionit Civil dhe kompania koncesionare. Sipas Policisë, furgoni me mbishkrimin “Hetimi Tatimor”, me të cilin lëviznin grabitësit, e ka hapur portën nga ana e parkingut 24-orësh, pak metra pa arritur te Baza Ajrore Ushtarake e Rinasit, në orën 14 e 57 minuta e 30 sekonda. Sipas pamjeve të kamerave të sigurisë, autorëve iu është dashur 1 minutë e 20 sekonda për të depërtuar në pistë.

Në kohën kur grabitësit i janë afruar avionit, në orën 14 e 59 minuta e 20sekonda, një fugon i Policisë ndodhej në Aeroportin e Rinasit, te vendqëndrimi i avionëve, pasi do të shoqëronte disa persona të deportuar nga vendet e BE-së. Megjithatë, efektivët që ndodheshin në këtë furgon pretendojnë se nuk kanë pasur fushëpamje në drejtim të avionit që pritej të nisej drejt Vjenës.

Por nga ana tjetër nuk janë njoftuar as nga shërbimet e ICTS. Sipas raportit të Policisë, nga verifikimi i kamerave konstatohet se në orën 14 e 59 minuta e 30 sekonda, furgoni i grabitësve ka ndaluar pranë krahut të djathtë të avionit të kompanisë “Austrian Airlines”. Grabitësit e armatosur kanë zbritur dhe duke kërcënuar punonjësit që po ngarkonin bagazhet, kanë marrë thasët me para.

Në raport thuhet se pas grabitjes, autorët kanë hipur në furgon dhe janë drejtuar me shpejtësi nga veriu, duke përshkuar pistën e avionëve në të gjithë gjatësinë e tij. Sipas pamjeve të kamerave të sigurisë, në orën 15 e 2 minuta e 20 sekonda ata janë afruar te porta që ndodhet në fund të pistës në rrethimin verior dhe kanë prerë zinxhirin, duke dalë në rrugë. Dalja në rrugën që të çon drejt fshatit Tapizë të Fushë-Krujës ka zgjatur 35 sekonda. /Nga Etleva DELIA/

Loading...