Rreth 6 muaj më parë, mjeku shkodran i QSUT- së prof.dr. Arvin Dibra, 52 vjeç, u dëmtua teksa lahej në lumin Buna në afërsi të Dajçit. Ai i dërgua me urgjencë në Tiranë me helikopter për një kujdes më të specializuar.
Më pas, ai është dërguar me avion privat drejt Italisë për mjekim të specializuar. Gjendja shëndetësore e tij ishte përmirësuar, por sërish ishte vendosur që mjeku të trajtohet në vendin fqinj për shkak të dëmtimeve serioze që kishte marrë në pjesën e qafës.
Ndërkohë, në mbledhjen e ditës së sotme, qeveria shqiptare ka marrë një vendim për të mbuluar shpenzimet e mjekimit të Arvin Dibra, në masën 2 000 000 (dy milionë) lekë. Prof.Dr.Arvin Dibra aktualisht është Shef i Klinikës 1 Kirurgjikale QSUT si dhe drejtues i Departamentit të Kirurgjisë në Universitetin e Mjekësisë.
V E N D I M
PËR
MBULIMIN E SHPENZIMEVE TË MJEKIMIT
TË Z. ARVIN DIBRA
Në mbështetje të nenit 100 të Kushtetutës, të ligjit nr.115/2024, “Për buxhetin e vitit 2025”, dhe në vijim të vendimit nr.15, datë 9.1.2025, të Këshillit të Ministrave, “Për financimin e shërbimeve shëndetësore spitalore nga skema e detyrueshme e sigurimeve të kujdesit shëndetësor për vitin 2025”, me propozimin e ministrit të Shëndetësisë dhe Mbrojtjes Sociale, Këshilli i Ministrave
V E N D O S I:
1. Mbulimin e shpenzimeve të mjekimit të z. Arvin Dibra, në masën 2 000 000 (dy milionë) lekë.
2. Ky fond të përballohet nga Fondi i Sigurimit të Detyrueshëm të Kujdesit Shëndetësor.
3. Pagesa të bëhet me paraqitjen e faturave përkatëse të institucionit të kurimit.
4. Ngarkohen Ministria e Shëndetësisë dhe Mbrojtjes Sociale dhe Fondi i Sigurimit të Detyrueshëm të Kujdesit Shëndetësor për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
