Kupa e Shqipërisë kthehet përsëri këtë mesjavë me ndeshjet e kthimit të çerekfinaleve, të cilat do të përcaktojnë katër skuadrat gjysmëfinaliste që vazhdojnë rrugëtimin për fitoren e turneut të dytë nga rëndësia në vendin tonë, por që garanton një biletë për Europën.
Duke parë situatën në kampionat dhe rivalitetin, shumë skuadra kanë kthyer sytë nga Kupa si shpëtim ndaj ky edicion pritet të jetë shumë i luftuar në ndeshjet e mbetura. Ndaj të gjitha sfidat janë për t’u shijuar dhe pikërisht për këtë fakt, janë planifikuar në dy ditë të ndryshme, të gjitha në orare të ndryshme.
Të mërkurën luhet vetëm një sfidë, ajo mes Teutës dhe Skënderbeut në “Elbasan Arena” dhe fillon në orën 16:45. Ndërkohë, të tre sfidat e tjera do të luhen ditën e enjte.
E para është ajo mes Laçit dhe Egnatias në orën 13:45. Më pas e ka radhën në 16:45 sfida mes Vllaznisë dhe Flamurtarit në Shkodër dhe në fund, dueli në “Air Albania”: mes Partizanit dhe Dinamos i cili fillon në orën 19:45.
Çerekfinalet e Kupës së Shqipërisë, ndeshjet e kthimit
09/02/2022
16:45 Teuta-Skënderbeu (1-0) në Elbasan
10/02/2022
13:45 Laçi-Egnatia (1-1)
16:45 Vllaznia-Flamurtari (2-1)
19:45 Partizani-Dinamo (1-1)
*Në kllapa, rezultatet e ndeshjeve të para.
