Pronaret e ish- hotel Rozafes ne Shkoder i ankohen kryeministrit: Voltana i dha leje ndertimi ish- deputetit

Mes halleve të njerëzve në Shkodër, kryeministri i vendit u njoh me rastin e një tjetër qytetareje që u ankua për kryebashkiaken Voltana Ademi. Qytetarja u shpreh se gjykata i ka dhënë të drejtë por në tokën e saj kryebashkiakja ka dhënë leje për ndërtim ish-deputetit të PD, Gjok Uldedaj.

“Ne jemi pronarë të ish-Rozafës por iu kanë kaluar të përndjekurve dhe ne kemi 22 vite gjyqeve. Kemi fituar dy herë në Gjykatë të Lartë. Sot ja kanë shit Gjok Uldedës deputetit të PD, kjo kryebashkiakja Voltana Ademi i jep leje për ndërtime të paligjshme atij, ndërkohë që ke vendim gjykate s’ke si jep leje për ndërtime”,- tha ajo.

Në përgjigjen e tij, kryeministri Rama tha se qeveria nuk mund të merret me gjykatat, ndërsa shprehu bindjen se situata mund të ndryshojë në shtator pas zbatimit të vettingut.

“Tek gjykatat s’ka magji me bo… Kemi 1 mandat që luftojmë, më në fund ka filluar procesi i vettingut. Në shtator-tetor do fillojnë shoshitjet e prokurorëve dhe gjykatësve. Sa hap e mbyll sytë nuk rregullohet kjo punë. Problemet e gjykatave nuk i zgjidh dot qeveria, vettingu do krijojë klimë presioni që të jenë më të përgjegjshëm. Për bashkinë e dini mirë ju ca mendoj për Voltanën. Por, është një rast që shkodranët të kuptojnë që vota vlen. Flasim sa të doni për Voltanën por ajo është rezultat i votës”,- u shpreh ai./BALKANWEB/