300 milion euro do të investohen për rehabilitimin e linjës hekurudhore Hani i Hotit- Vorë. Shifra është e njohur gjatë një konsultimi publik të organizuar nga Bashkia e Shkodrës lidhur me projektin tashmë të përfunduar dhe që pret financimin. Është parashikuar që projekti të ketë 4 lote, nëse nuk bëhet e mundur financimi i plotë i menjëhershëm i projektit.
“Bashkia e Shkodrës ka organizuar sot konsultim publik mbi “Projektin e Zbatimit për Rehabilitimin e Linjës Hekurudhore Vorë – Hani i Hotit, Shqipëri”, pjesë e korridorit të X-të, mbështetur nga Fondet e Bashkimit Evropian. Të pranishëm në takim ishin qytetarët, teknicienët dhe palët e interesuara për këtë projekt madhor.
Në prezantimin e projektit, u evidentua se do të rikualifikohet Stacioni Hekurudhor i Shkodrës, traseja që trenat të mund të udhëtojnë deri në 120 km/orë, do të ndërtohen 18 km rrugë dytësore të asfaltuara kategoria C2, do të ndërtohen vepra artit të reja, do të rritet traseja ekzistuese nga 6 m në 6.60 m, duke krijuar keshtu mundësinë e trenit elektrik në të ardhmen.
Të pranishmit në këtë konsultim publik, kanë qenë mjaft aktivë me pyetje, sugjerime dhe konstatime lidhur me projektin e prezantuar. Bashkia e Shkodrës falenderon Hekurudhat Shqiptare sh.a., donatorët për mbështetjen e vazhdueshme jo vetëm për këtë projekt por në vijimësinë e bashkëpunimit me ta, bashkëpunim të cilin jemi të vendosur ta vazhdojmë e forcojmë në interesin e komunitetit.”, thuhet në publikimin në Facebook të Bashkisë Shkodër.
Brenda vitit 2021 mendohet të sigurohet financimi nga BERZH dhe BEI ndërsa vitin e ardhshëm nis edhe puna konkrete në terren. Investimi i hap rrugën për të ardhmen edhe transportit të pasagjerëve me anë të trenave elektrikë. Në Qarkun e Shkodrës projekti do të implementohet në bashkitë Shkodër, M.Madhe dhe Vau- Dejës. Pjesë e projektit është edhe një linjë hekurudhore me Kosovën, 99 km e gjatë, duke nisur nga stacioni i Mjedës. /ShkodraWeb/