Fatmir Lleshaj është emëruar zyrtarisht si drejtor i DVP Shkodër dhe është prezantuar para efektivëve që do të drejtojë nga ministri i brendshëm Hoxha dhe drejtori i Përgjithshëm i Policisë së Shtetit Proda.
Lleshaj është një oficier karriere në polici, ku ka mbajtur detyra të ndryshme, madje edhe në Shkodër, ku është një emër i njohur i uniformave blu. Ai është pjesë e uniformave blu prej rreth 23 vitesh, ndërsa nga 27.4.2017 deri me 1.12.2019 rezulton i papunë apo në dispozicion të Drejtorisë së Përgjithshme të Policisë së Shtetit.
Drejtues Fatmir Lleshaj, ka kaluar edhe procesin e vetting- u në Policinë e Shtetit, ku me vendimin Nr. 21, datë 05.04.2024 nga Trupa e Vlerësimit pranë Agjencisë së Mbikëqyrjes Policore, ka kaluar me sukses “sitën” për kriterin e pasurisë, integritetit dhe profesionalizmit.
Lleshaj është emëruar drejtor policie në Shkodër pasi ishte pjesë e garës së shpallur për 12 vendet në nivel qarku, duke pasuar në këtë detyrë ish- drejtorin Edmond Sulaj. Për vetë karakteristikat që ka shfaqur në detyrë, sidomos gjatë punës në Shkodër, pritshmëritë për Lleshaj janë mjaft të larta për rendin e sigurinë publike, veçanërisht në përballjen me krimin e organizuar.
Duke klikuar këtë link KËTU, mund të njiheni edhe me vendimin Nr. 21, datë 05.04.2024 nga Trupa e Vlerësimit pranë Agjencisë së Mbikëqyrjes Policore për Fatmir Lleshaj.
