Ted Kopliku nuk është rastësisht pjesë e listës së kandidatëve për deputetë të Partisë Demokratike për Qarkun Shkodër. Ai është pjesë e një bërthame familjare me lidhje dhe kontribute për këtë forcë politike. Në këtë vazhdë, natyrshëm edhe angazhimi politik i Tedit, do të ishte në këtë linjë të vijimësisë së etapave të jetës.
Ajo që vihet re menjëherë, janë disa karakteristika të brezit që Tedi përfaqëson edhe në politikë. Dukshëm është impulsiv, deri tek i vrullshëm nëse do të flasim me figura letrare të përshtatshme. Ai prezanton imazhin e një të riu idealist, duke gjetur ngjashmëri tek disa elementë të të rinjve të fillim viteve ’90.
Aftësitë në artikulim, kontatohen lehtësisht në daljet e tij publike, qoftë në media por edhe në takime përballë me qytetarët. Forca e artikulimit por edhe argumentimit, janë mbi nivelin mesatar të brezit që përfaqëson. Gjuha e përdorur në komunikim, natyrshëm është ajo e një kritizeri përballë një rivali në qeverisje, duke u përpjekur të bindë se alternativa politike që përfaqëson, është më e mirë.
Edhe si pjesë e “Brain Gain”, Tedi e njeh terrenin politik, pjesë e rëndësishme e të cilit, si deputet, kërkon të bëhet pas 11 majit 2025. Por sigurisht, kjo periudhë, deri me shpalljen e rezultatit të zgjedhjeve, do ti sherbejë për ta njohur më në brendësi, siç ndodh normalisht me çdo individ që bëhet pjesë e një gare politike, këtë herë dyfishe: përballë rivalit politik por edhe përballë kandidatëve të së njëjtës “familje politike”.
Të thuash që sfida e Ted Koplikut është tatëpjetë, e lehtë, nuk është shumë pranë të vertetës. Njësia matëse e një gare elektorale, janë votat që vijnë nga zgjedhësit. E në garën “brenda familjes”, Tedi ka përballë figura të njohura prej vitesh politikisht brenda strukturave por edhe publikisht përmes aktivitetit.
Por edhe në këtë garë, Tedi mund të ketë një “faktor plus”. Duke qenë një figurë e re politike, me moshë të re, me cilësi lehtësisht të dallueshme në publik, mund të sherbejë si magnet, brenda dhe jashtë “familjes politike” ku bën pjesë. Aq më tepër, kur përballë ka edhe “xhaketa të vjetra”, bojëdalë nga jashtë dhe me astar të holluar si “letër cigare” nga brenda.
Pavarësisht asaj që duket mediatikisht, shkodranët kanë dhënë mjaftueshëm prova se ditën e fundit vendosin për votën e tyre. Deri atëherë, të gjithë duhet të presin, edhe Ted Kopliku. Sigurisht, siç edhe të tjerët, punon dhe duhet punuar por edhe nëse rezultati nuk është ai që pritet, Tedi ka një favor: moshën e re! Në të gjithë skenarët e mundshëm, ai akumulon një vlerë që merret me vete: eksperiencën, e cila ndihmon edhe në rritjen e ngritjen politike! /ShkodraWeb/
