Matilda Matija ishte kandidatura e parë zyrtare për deputete në zgjedhjet e 11 maj 2025 në qarkun e Shkodrës. Në një sallë të tejmbushur, ajo u prezantua si një e re, e cila kërkon të përfaqësojë bashkëqytetarët e saj në parlamentin e ri. Ishte mesi i muajit shkurt, kur Matilda shpalli ambicjen e saj për të nisur një rrugëtim tjetër. Besojmë se zgjedhja e saj për të hyrë në politikë, ka qenë e mirëmenduar dhe e konsultuar, ndërsa Partia Agrare Ambjentaliste, subjekti që e kandidoi, ishte zgjedhje për të treguar se nuk i atashohet “partive të mëdha”, siç kërkojnë dhe bëjnë shumica e të rinjve për të hyrë e ecur në politikë.
Sot, Matilda është pjesë e listës së hapur të koalicionit për Shqipërinë Madhështore. Nga prezantimi i saj dhe deri para pak orëve, kjo vajzë ka ecur mjaft, sidomos në komunikimin publik. Politika, brenda e jashtë Shqipërisë, njeh raste kur individë të ndryshëm, pavarësisht ideve që mund të kenë, nuk i artikulojnë në mënyrën e duhur por ky nuk është rasti i Matildës. Përkundrazi.
Arsimimi, përzgjedhja e institucioneve ku ai përfitohet, është shumë i rëndësishëm për një individ. Me gjasë, kjo është një nga pikat e forta të Matildës por jo më e forta. Për shkak të angazhimit shumë të gjatë të familjes së saj në futbollin e femrave, Matilda ka pjesën e vetë të rëndësishme në sukseset e Vllaznisë së vajzave, kampione e pakontestueshme në Shqipëri dhe ekipi më i njohur e i suksesshëm shqiptar në arenën ndërkombëtare.
Natyrisht, shumëkush mund të pyes: çfarë lidhje ka kjo eksperiencë me kandidimin e saj si deputete? Kjo pyetje, vjen ndoshta nga persona që nuk e kuptojnë sa duhet lojën që zhvillohet në “fushën e blertë”. Janë vetëm 90 minuta që sheh dhe shijon publiku, por janë mijëra të tjerë që e parapërgatisin atë ndeshje. Ka përgatitje fizike, taktike, teknike dhe mbi të gjitha psikologjike. Në fund, ajo që triumfon, është mentaliteti i kijuar dhe në këtë rast, Matilda ka fatin të jetë rritur me mentalitet kampioni!
Edhe politika, është e ngjashme me futbollin. Daljet publike apo seancat në Kuvend, janë vetëm maja e ajsbergut të saj, pjesa e dukshme për publikun. Pjesa e padukshme, është më e rëndësishmja, e cila i paraprin vendimmarrjeve të rëndësishme për qytetarët. Matilda Matija ka hyrë në politikë si njohëse e mirë e mënyrës se si funksionon kjo “ndeshje”, ka hyrë në politikë me mentalitet kampioni. “Ndeshja” zgjat 90 minuta por ajo përfundon vetëm pas fishkëllimës së trefishtë të arbitrit.
Është akoma shpejt të analizohet nëse kjo garë e 11 majit 2025 është përmbushja e dëshirës së një të reje për të kontribuar për bashkëqytetarët e saj në nivelin më të lartë të politikës apo është vetëm hapi i parë i angazhimit të saj. Ndoshta mbetet të shihet pas 11 majit 2025, kur Matilda do ta kuptojë më në detaje funksionimin e politikës duke e parë nga brenda, duke vlerësuar nëse ia vlen apo jo, ngjashmëritë apo ndryshimet edhe me futbollin. Sot thjesht mund të pohohet se Matilda Matija është futur në garë me mentalitet kampioni. Ata që ndjekin sportin, sidomos futbollin, e kuptojnë mirë çfarë bonusi ka në garë! /ShkodraWeb/
