Për mua personalisht, kandidimi i Kliti Hotit në zgjedhjet e 11 maj 2025, nuk ishte suprizë. Edhe pse në distancë, prej vitesh e kam parë aktiv në shumë aspekte të jetës. Jo vetëm për shkak të profesionit si mjek por edhe në angazhimit në fusha të tjera të ndryshme, duke patur si kryefjalë gjithmonë Shkodrën.
Kliti nuk ka nevojë për reklamë, nuk ka nevojë as për avokati. Ai është pjesë e një grupi të vogël të rinjsh, elite, e cila ka ditur të bashkëpunojë e bashkëveprojë, duke mos u penguar nga pozicionimet e momentit, qoftë edhe politike. Shembujt janë disa dhe Shkodra, shkodranët por edhe përtej, i dinë mirë.
Ai është ndër djemtë e realizuar të Shkodrës, duke ndjekur fort nga pas ëndrrat e tij. E ëndrra, ndoshta më e madhe dhe më publike, është Shkodra, e parë kryesisht në kënvështrimin sportiv. E për ti shërbyer kësaj ëndrre, realizimit e materializimit të saj, Kliti nuk kurseu asnjëherë, për shumë e shumë vite radhazi.
Në fakt, Kliti nuk ka nevojë as për këto pak rreshta. Thjesht, si njohës nga larg i aktivitetit të tij publik, edhe si Konsull Nderi i Hungarisë, po jap disa konsiderata personale, pa dashur të influencoj, të ngre apo shemb piedestale. Një emër si Kliti Hoti, i bën nder dhe do ti bënte nder çdo liste të mbyllur apo të hapur të partive politike në Qarkun e Shkodrës.
Jam i bindur, se në hapësirat që do të ketë si deputet i Shkodrës, përsëri do të vazhdojë të ndjekë e realizojë ëndrrat e tij. Besoj se as “Triathlon Labeat” nuk do ti ndahet asnjë vit, as edhe ndeshjeve e turneve të tenisit në Shkodër, një tjetër pasion i tij publik. Do të jetë një zë i fortë për Shkodrën, duke mos patur ngarkesa të asnjë lloji, as edhe politike. Sepse ashtu duket është formuar, ashtu e njoh unë të paktën prej shumë vitesh, në aspektin e tij publik. /Nga Sokol N. SOKOLI/
