Procesi i zgjedhjeve në PD Shkodër, Xhevdet Amuli: Po rezulton në përçarje me qëllim uzurpimin me çdo kusht…

Partia Demokratike, dega Shkodër kundërshton përpjekjet që po bëhen për një proces në dukje zgjedhor nga persona të vetëdeklaruar si Komisioni i Rithemelimit në Shkodër.

Ky proces nuk ka asgjë të përbashkët me zgjedhjet, reformimin apo organizimin e Partisë Demokratike të degës Shkodër dhe aq më pak ka të bëjë me votën e lirë. Ky proces, në tërësinë e tij po bazohet mbi emërime të individëve në krye të seksioneve apo grupseksioneve të cilët nuk kanë dakortësinë e anëtarësisë. Procesi zgjedhor i pretenduar se po zhvillohet në një pjesë të grupseksioneve të Degës, përtej propagandës, rezulton një proces përjashtues sepse nuk ka përfshirë anëtarë të cilët kanë kontribuar, demokratë që kanë sakrifikuar ndër vite dhe punuar për Partinë Demokratike edhe pse të pa vlerësuar për sakrificat dhe kontributet e tyre, duke besuar në vlerat e saj.


Përtej propagandës dhe deformimit të realitetit, se ky proces po bëhet në emër të bashkimit, mosrespektimi i të drejtave të demokratëve, mospërfshirja dhe përjashtimi nga ky proces i anëtarëve të cilët mendojnë ndryshe, po rezulton vetëm në përçarje dhe ka vetëm një qëllim, uzurpimin me çdo kusht.

Kryesia e Partisë Demokratike, dega Shkodër, gjatë mbledhjes së mbajtur sot më dt.09.04.2022,shpreh qëndrimin se asgjë nuk duhet të na ndalojë të jemi bashkë dhe do të vazhdojmë të punojmë të palëkundur në këtë qëndrim. Por bashkimi i demokratëve duhet të jetë një bashkim i vërtetë dhe real, një bashkim që nuk përjashton por që përfshin, një bashkim që nuk mohon por mbështetet në vlerësimin e kontributeve të gjithësecilit.

Në emër të këtij bashkimi, i cili duhet të bazohet në vlera dhe parime, të bazohet në gjithpërfshirje, në transparencë dhe garantim të votës së lirë, i bëjmë thirrje asaj pjese të Partisë Demokratike, e cila sot është e angazhuar me Komisionin e Rithemelimit të ndërpresë këtë proces zgjedhor si një proces jo ligjor, uzurpues dhe aq më pak legjitim.

Përpjekjet për të vazhduar në një proces përjashtues dhe të njëanshëm, nuk shprehin vullnetin dhe qëllimin për bashkim të demokratëve dhe të Partisë Demokratike, por dëmtimin dhe përçarjen e saj të pashmangshme.

Bashkimi i demokratëve duhet të shërbejë për të ringritur Partinë Demokratike mbi vlera dhe parime, duhet të shërbejë për një Parti Demokratike që i flet shoqërisë shqiptare dhe i ofron kësaj shoqërie vlerat e saj më të mira së bashku me një vizion të qartë se çfarë duam të jemi ne në të ardhmen. /Publikuar në faqen Facebook të Xhevdet AMULI/