Presidenti i Republikës, Ilir Meta ka vlerësuar ditën e sotme me “Dekoratën e Artë të Shqiponjës” heroin Arjan Sala (pas vdekjes).
Kujtojmë se Sala u vetësakrifikua për të shpëtuar jetët e punonjësve dhe kolegëve nga zjarri i rënë në magazinën e një qendre tregtare në Tiranë.
Meta i akordoi Arjan Salës dekoratën e lartë me motivacionin: “Në shenjë vlerësimi e respekti të thellë për heroizmin e pashoq në përmbushjen e detyrës për të shpëtuar jetën e shumë qytetarëve. Për sakrificën dhe vetëflijimin e tij sublim, me të cilat ai hyri në zemrat tona, si shembull i heroizmit dhe humanizmit”.
Në fjalën e tij ndër të tjera, Presidenti Meta duke iu drejtuar familjarëve dhe miqve të Salës, u shpreh se njerëz të tillë si Arjan Sala i bëjnë nder kombit. Kreu i Shtetit deklaroi më tej se vepra heroike e Arjanit imponon respektin dhe mirënjohjen e përjetshme të gjithë shqiptarëve, jo vetëm të atyre që ai u shpëtoi jetën.
