Partia Demokratike ka reaguar përmes nënkryetarit të saj, Enkelejd Alibeaj pas lajmit të publikuar në “Panorama.al“, ku paparacët në Kuvend kanë fiksuar në celularin e Flamur Nokës komunikime me njerëzit më të aftërt të Edi Ramës.
Në rubrikën e mesazheve të deputetit, bie në sy komunikimi i Flamur Nokës me ministrin e besuar të Edi Ramës, me Ulsi Manjën e po ashtu dhe emojit me kryetaren e Kuvendit, Lindita Nikolla etj.
Në një reagim në rrjetet sociale, Enkelejd Alibeaj shkruan se në mesazhet me kryetaren e Kuvendit, Noka e ka “porositur” këtë të fundit që t’ja japë fjalën Sali Berishës për procedurë.
“Edhe një herë Berishën për procedurë dhe të ikim ne :)”, dhe një emoji me fytyrë të qeshur, është mesazhi që Alibeaj thotë se Noka i ka dërguar kryeparlamentares Nikolla.
Alibeaj ka publikuar gjithashtu me video edhe momentet kur në seancën e të enjtes në Kuvend, Berisha kërkon fjalën dhe nga vendi ndërhyn edhe Noka që thotë “fjalën për procedurë”.
POSTIMI I PLOTE I ENKELEJD ALIBEAJ
Që prej 9 shtatorit, Sali Berisha, për të hequr vëmendjen nga non grata e tij për korrupsion, ka nisur një fushatë të turpshme shpifjesh e mashtrimesh kundër lidershpit të PD.
Ndërsa hedh mashtrime nga më ordineret, familjarët dhe bashkëpunëtorët e tij vazhdojnë të pasurohen duke bashkëpunuar me Edi Ramën dhe qeverinë e tij.
Edi Ramës i duhet një njeri si Sali Berisha, ish-kryeministri i vetëm në Europë i shpallur non grata për korrupsion, një njeri i izoluar nga SHBA dhe BE.
Prandaj Rama i ka vënë në dispozicion gjithë makinerinë e propagandës së tij duke bashkëpunuar më së miri me të, siç ndodh dhe në këtë komunikim të kapur nga mediat ku Flamur Noka bashkërendon me Ulsi Manjën dhe Lindita Nikollen.
Nga njëra anë ndajnë pazare dhe koordinojnë luftën kundër PD, nga ana tjetër foltorexhinjte non-grata sulmojnë lidershipin e PD.
Kushdo me sy në ballë e mend në kokë e kupton tashmë se në Shqipëri ka vetëm një opozitë, që është PD.
Rama dhe Berisha janë njësoj. Zgjidh Ramën dhe merr edhe Berishën. Zgjidh Berishën dhe merr Ramën.
Ndërkohë deputeti i PD dhe njëherazi anëtar i Komisionit të Rithemelimit, Flamur Noka, ka reaguar pas sulmeve në adresë të tij nga njerëzit e Lulzim Bashës dhe mediave që e mbështesin atë.
Përmes një deklarate, Noka tha se ka komunikuar me kryetaren e Kuvendit që t’i jepet fjala ish-kryeministrit. Gjithashtu, Noka sqaroi se Ulsi Manja mund të flasë edhe vetë se pse kanë komunikuar së bashku.
“Une kurre nuk kam bere e as nuk bej biseda per pallate tek 5 Maji a tjeterkund, dhe as per para inceneratoresh siç ben kreu i shoqates me zëvendësen e tij, apo me media që ju bën fushatë atyre. Une kam komunikuar me Kryetaren e kuvendit qe ti jepet fjala ish-Kryeministrit Berisha. SMS-ja e tregon qarte. Ulsin le ta pyesin se pse kam komunikuar. Nuk kam bere pazare qe te me fuse ne pune gruan siç i ka kerkuar pengu i pallateve te ‘5 Majit'”, thotë Flamur Noka.
Deklarata
Sot, Shoqata e Bravave nepermjet pengut te Kapllan Pallateve te 5 Majit paska ciceruar kunder meje.
Une kurre nuk kam bere e as nuk bej biseda per pallate tek 5 Maji a tjeterkund, dhe as per para inceneratoresh siç ben kreu i shoqates me zëvendësen e tij, apo me media që ju bën fushatë atyre.
Une kam komunikuar me Kryetaren e Kuvendit qe ti jepet fjala ish-Kryeministrit Berisha. SMS-ja e tregon qarte. Ulsin le ta pyesin se pse kam komunikuar. Nuk kam bere pazare qe te me fuse ne pune gruan siç i ka kerkuar pengu i pallateve të ‘5 Majit’.
Flamur Noka i ka kerkuar te rrije larg pazareve Rama-Brava ne Diber. Ai mund t’jua thote vete ai pse debatuam.
Se kush ben pazare shqiptaret e kane pare ne 17 Maj. Milionat dhe karriget e ministrave nga Edi Rama i kane marre vetem kllounet e shoqates Basha – Bardhi ndersa Flamur Noka bashke me te gjithe demokratet e vertete kane marre burgjet e regjimit, gazin lotsjelles dhe 6 pale zgjedhje te humbura si fature e pazareve Rama – Brava.
Ditet ne vazhdim do te tregojne se pse deshtoi komisioni i inceratoreve, kush perfitoi, e cfare ndodhi ne pazarin Rama-Brava.
Flamur Noka
Komisioni i Perkohshem i Rithemelimit te PD