Ish- kryebashkiakut socialist i bien tre akuza, gjykata vendos ti pushojë dosjen e tij…

Ish-kryebashkiakut socialist të Vorës i bien tri akuzat, e për pasojë Gjykata vendos t’i pushojë dosjen. Vendimi është marrë nga Shefkie Demiraj në Shkallën e Parë të Gjyqësorit të Tiranës, ndërkohë që Prokuroria ka kërkuar që Kajmakut mos t’i pushohej dosja, por t’i rrëzohej dënimi me burg.

Por, Gjykata ka qenë edhe kundër kësaj kërkese pasi prokurori i çështjes, Ardian Dyrmishi, kërkoi që burgu t’i zëvendësohej me një dënim alternativ, por jo të mos dënohej fare. Kajmaku, i cili u vu nën akuzë dhe u shpall në kërkim, ka tri vite që hetohet për tri akuzat, të cilat ditën e djeshme janë rrëzuar nga ana e gjykatës. Ndonëse ai qëndroi disa kohë në kërkim, arrestimi i tij u krye në një spital privat në Tiranë, teksa ish-kryebashkiaku po kurohej.


Dosja aq shumë e përfolur e Agim Kajmakut tashmë ka marrë një zgjidhje të re gjyqësore. Vendimi për këtë çështje u mor dje në Gjykatën e Tiranës, nga ku gjyqtarja urdhëroi pushimin e tri akuzave, duke çuar çështjen e tij në një dështim ligjor. Po dje, prokurori i çështjes, Ardiano Dyrmishi, ka vendosur të apelojë vendimin e Gjykatës së kryeqytetit, duke kërkuar deklarimin fajtor dhe dënimin me 1 vit burgim të zyrtarit të Partisë Socialiste në Vorë, Agim Kajmaku.

Por, për shkak të rrethanave mbi gjendjen shoqërore dhe gjyqësore të pandehurit, Prokuroria në pretencën e saj kërkoi që dënimi me burg të pezullohet dhe Kajmaku të vuante një dënim alternativ. Por edhe kjo kërkesë e Prokurorisë nuk është pranuar nga gjyqtarja, Shefkie Demiraj, e cila urdhëroi pushimin e plotë të dosjes. Bëhet me dije se vendimi për pushimin e çështjes është marrë kohë më parë. Për dy akuza, “Falsifikimi i vulave, stampave ose formularëve” dhe “Kryerja e funksionit pas dhënies fund të detyrës”, bëhet me dije se ka qenë vetë prokuroria që është tërhequr dhe ka kërkuar pushimin e tyre.

Ish-kryebashkiaku i Vorës, Agim Kajmaku, që qëndroi disa muaj në kërkim akuzohet nga prokuroria e Tiranës se ka firmosur shkarkimin nga detyra të dy nën/kryetarëve të bashkisë Vorë. Dhe dy shkresat të firmosura nga Kajmaku, përkojnë në një kohë kur vetë Kajmaku ishte shkarkuar nga detyra, si zyrtar i prekur nga ligji dekriminalizimit. Në atë periudhë Bashkia e Vorës pretendoi se shkarkimi nga detyra i nënkryetarëve është bërë në 30 tetor, një ditë para shkarkimit që KQZ-ja i bëri Kajmakut në 1 nëntor.

Kajmaku u tha se dyshohej se kishte falsifikuar datën e vendimit të shkarkimit të dy nënkryetarëve të Bashkisë, ndaj dhe Prokuroria i qëndroi deri në fund kësaj akuze, duke kërkuar dënimin e tij. Fillimisht, Agim Kajmaku, u denoncua nga opozita, se kishte fshehur dënimin në Greqi për fshehje të ardhurash, gjë që nuk e kishte deklaruar, kur kishte plotësuar formularin e dekriminalizimit.